AYNA ictimai nəqliyyat şəbəkəsinin diaqnostikası və süni intellekt platformasının yaradılması üçün tender elan edib. Tenderin ehtimal olunan dəyəri 3 milyon manatdır. Bu məbləğə sistemin hazırlanması və birillik texniki dəstək daxildir.
Ucnoqta.az xəbər verir ki, bu fikirləri Azərbaycan İnternet Forumunun prezidenti və İKT eksperti Osman Gündüz deyib. Ekspertin szlərinə görə, açıqlanan şərtlərdən görünür ki, yeni platformanı ictimai nəqliyyatın idarə olunması üçün “mini” intellektual sistem hesab etmək olar:
“Sistem avtobusların hərəkəti, sərnişin ödənişləri, marşrutlar və digər məlumatlar əsasında gecikmələri, sıxlığı, sərnişin tələbatını və problemli istiqamətləri təhlil etməlidir.
Əlbəttə, düzgün qurularsa və nəticələr əsasında qərarlar qəbul edilərsə, bu platforma ictimai nəqliyyatın planlaşdırılması və xidmətin keyfiyyətinin yüksəldilməsi üçün faydalı ola bilər”.
Osman Gündüz qeyd edir ki, layihə çərçivəsində süni intellekt əsaslı agent də yaradılacaq:
“AYNA əməkdaşları ona suallar verərək nəqliyyat şəbəkəsi ilə bağlı məlumatları əldə edə, daha doğru qərarlar verə biləcəklər.
Göründüyü qədərilə sistem birbaşa vətəndaşlara deyil, əsasən AYNA-nın təhlil və qərarvermə fəaliyyətinə xidmət edəcək. Vətəndaşlar isə onun nəticələri əsasında görüləcək tədbirlərdən faydalana bilərlər”.
Ekspert əlavə edib ki, AYNA-nın artıq bir neçə rəqəmsal sistemi var:
“Map AYNA marşrut və dayanacaqlar haqqında məlumat verir, AYNA MaaS isə səfərləri planlaşdırmağa imkan yaradır. Qurumun sərnişindaşımaları izləyən monitorinq imkanları da mövcuddur.
AYNA mövcud və yeni qurulacaq sistemlərin qarşılıqlı əlaqələri, inteqrasiyası və təkrarlanmaların necə qarşısının alınacağı haqqında hələlik açıqlama verməyib.
AYNA-nın indiki təşəbbüsü bir vaxtlar böyük gözləntilərlə yaradılmış Nəqliyyatı İntellektual İdarəetmə Sistemini də yada salır. 110 milyonluq bu layihə qarşıya qoyulan vəzifələri icra edə bilməyərək əsasən iflasa uğrayıb. Azərbaycanın rəqəmsallaşma tarixində ən böyük uğursuz layihələrdən biri hesab olunur.
Hazırda onun bəzi komponentlərinin işlək olduğu Nəqliyyatı İntellektual İdarəetmə Mərkəzi DİN tabeliyində fəaliyyət göstərir.
Düşünürəm ki, AYNA əvvəlki təcrübəni ciddi təhlil etməli, uğursuzluqların səbəblərindən nəticə çıxarmalıdır. Köhnə sistemdən hansı imkanların qaldığı və onlardan faydalanmaq haqqında düşünmək də faydalı olardı.
Yeri gəlmişkən, AYNA-nın 3 milyonluq bu layihəsi üzrə yeni qaydalara və tələblərə uyğun olaraq RİNN-dən texniki və səmərəlilik baxımından məqsədəuyğunluq rəyi alınması haqqında açıqlama verilməyib”.