Məktəblərdə vahid geyim formasının tətbiqi ilə bağlı Nazirlər Kabinetinin qərarından sonra cəmiyyətdə müxtəlif müzakirələr yaranıb. Xüsusilə, məktəbli geyimi ilə hicab məsələsinin gündəmə gətirilməsi mövzu ətrafında fikir ayrılıqlarına səbəb olub. Təhsil müəssisələrində müəyyən edilmiş geyim qaydalarına əməl olunması müzakirə predmetinə çevrilib.
Ucnoqta.az xəbər verir ki, Əməkdar jurnalist, “Üç nöqtə” qezetinin baş redaktoru Xoşqədəm Hidayətqızı mövzu ilə bağlı TV1 studiyasının “Açıq tribuna” verilisində danışıb.
Əməkdar jurnalist qeyd edib ki, çox təəssüf ki, belə bir problemlə qarşılaşırıq.
“Sovet dövründə təhsil almışıq. Həmin dövrdə məktəb formasız dərsə getməzdik. Əks halda, məktəbə buraxılmır, valideynlərimizə məlumat verilirdi.
Bu gün də məktəbə vahid geyim formasında gəlməklə bağlı qərar qəbul edilibsə, bu, məktəblilərin mənafeyinə və təhsilə xidmət edir. Ona görə də bu məsələni müzakirə obyektinə çevirməyi düzgün hesab etmirəm. Azyaşlılarımız, məktəblilərimiz məktəbin qaydalarına əməl etməyə borcludurlar”.
X. Hidayətqısı bildirib ki, onlar qərar vermək yaşına çatdıqda heç kim onlara necə geyinməli olduqlarını diktə etməyəcək:
“Bu, onların şəxsi seçimləri və azad iradələri olacaq. Bu gün bizim ailəmizdə də hicab taxanlar var. Heç kim onlara niyə hicab taxdıqlarını soruşmur. Lakin məktəbliyə vahid geyim formasında dərsə gəlməli olduğu bildirildikdə buna etiraz edilirsə, məsələ artıq müzakirə obyektinə çevrilir.
Məktəbin qarşısında baş verənlərə görə təəssüflənirəm. Belə hallar yaşanmamalıdır. Qəbul edilən bu qərar heç kimin dini baxışlarına, hər hansı geyimi seçməsinə və ya şəxsi seçimlərinə mane olmaq məqsədi daşımır”.
Emin