Aprelin 4-də Azərbaycan Dillər Universitetinin təşəbbüsü, Şəki-Zaqatala Regional Təhsil İdarəsinin və Zaqatala Rayon İcra Hakimiyyətinin dəstəyi ilə Şimal-qərb bölgəsinin ümumi təhsil məktəblərində İngilis, Alman və Fransız dillərini tədris edən müəllimlər üçün “Müəllimlərin professionallıq və peşə vərdişlərinin təkmilləşdirilməsi” mövzusunda sayca 2-ci regional konfrans keçirilib.
Ucnoqta.az xəbər verir ki, konfransda Azərbaycan Dillər Universitetinin rektoru, akademik Kamal Abdulla, Zaqatala Rayon İcra Hakimiyyətinin başçısı Mübariz Əhmədzadə, Şəki-Zaqatala Regional Təhsil İdarəsinin müdiri Günay Mahmudova və 300-ə yaxın xarici dil müəllimi iştirak edib.
Öncə konfrans iştirakçıları ümummilli lider Heydər Əliyevin abidəsi ziyarət edib, önünə gül dəstələri qoyulub, Ulu Öndərin əziz xatirəsi dərin ehtiramla anılıb.
Konfransda Dövlət Himni səsləndirildikdən sonra, Ulu Öndər Heydər Əliyevin və torpaqlarımızın işğaldan azad edilməsi uğrunda canlarını qurban vermiş şəhidlərimizin əziz xatirəsi bir dəqiqəlik sükutla yad olunub.
Konfrası giriş sözü ilə açan Zaqatala Rayon İcra Hakimiyyətinin başçısı Mübariz Əhmədzadə təhsil işçiləri üçün təşkil edilən konfransın xüsusi əhəmiyyəti olduğunu vurğulayıb. O, Ulu Öndər Heydər Əliyevin təhsil siyasətinin əhəmiyyətini vurğulayıb və Cənab Prezident İlham Əliyevin təhsil sahəsinə göstərdiyi diqqət və qayğısından danışıb.
Sonra Azərbaycan Dillər Universitetinin rektoru Kamal Abdulla məzunlarla işin önəmini qeyd edərək, peşə vərdişlərinin təkmilləşdirilməsi və yeni tədris metodlarının tətbiqinin vacibliyini vurğulayıb. Rektor konfransın tədris metodlarını müasirləşdirmək və müəllimlər arasında təcrübə mübadiləsini genişləndirmək baxımından böyük əhəmiyyət kəsb etdiyini bildirib.
Daha sonra çıxış edən Şəki-Zaqatala Regional Təhsil İdarəsinin müdiri Günay Mahmudova konfrans altı rayonu əhatə etməsinin xarici dil müəllimlərinin peşə fəaliyyətinin inkişafına mühüm töhfə verdiyini vurğulayıb. İdarə müdiri müəllimlərin peşəkarlığının artırılmasının təhsilin keyfiyyətinin yüksəldilməsi üçün zəruri olduğunu qeyd edib və ADU-nun təşkil etdiyi regional konfransların bölgədəki müəllimlər arasında təcrübə mübadiləsini təmin etmək baxımından əvəzsiz bir imkan yaratdığını bildirib.
Konfransın davamında Milli Qəhrəman Mübariz İbrahimov adına Biləsuvar bağça-lisey kompleksinin direktoru Aqşin Bağırov, ADU-nun Təhsil fakültəsinin dekanı, Elm və Təhsil Nazirliyi yanında ictimai şuranın sədri professor Hikmət Əlizadə və digər iştirakçılar peşəkar inkişaf məzmunlu regional konfransların elmi əməkdaşlığa və yeniliklərin tətbiqinə verdiyi töhfələrdən danışıblar.
Konfransın ikinci hissəsi 4 istiqamətdə panel müzakirələri ilə davam edib.