Birinci Liqada çıxış edən "Mingeçevir" klubu yanvarın 5-də yeni sponsoruna qovuşacaq. Bölgə təmsilçisi ASTA ilə (Azerbaijan Sport Talents Academy) əməkdaşlığa başlayacaq.
Ucnoqta.az bildirir ki, Bu barədə Publika.az-a Futbolun İnkişaf Fonundan (FİF) məlumat verilib.
Tərəflər arasında müqavilənin imzalanma mərasimi sabah Bakıda keçiriləcək. Mərasim məhz FİF-in təşkilatçılığı ilə baş tutacaq. Qurum digər bölgə klubları kimi "Mingəçevir"ə də tərəfdaş tapmaqda köməklik edib.
ASTA iş adamı Adnan Əhmədzadəyə məxsusdur. Bu ad altında hazırda aşağı yaş qrupu üzrə liqalarda komandalar çıxış edir. Bundan əlavə, şirkət istedadlı azərbaycanlı futbolçuların ölkə xaricində – Barselonada uzunmüddətli təlimini təşkil edir.
Adnan Əhmədzadə SOCAR-da yüksək vəzifə tutub. O, ötən ilin noyabr və dekabr aylarında "Barselona"nın əfsanəsi Ronaldinyonu, klub prezidenti Xuan Laportanı və "İnter Mayami"nin ulduzları – Lionel Messi, Luis Suares, Xordi Alba və Serxi Busketsi Azərbaycana dəvət etməsi ilə gündəmə gəlmişdi.