Bundan sonra avtobus zolaqlarına daxil olan minik avtomobilləri kameralar vasitəsi ilə qeydə alınaraq ictimailəşdiriləcək.
Ucnoqta.az xəbər verir ki, Bakı Nəqliyyat Agentliyi bu məqsədlə sürücülərə xəbərdarlıq edib.
Qurumun mətbuat katibi Mais Ağayevin “Xəzər Xəbər”ə deyib ki, minik avtomobilləri daha çox paytaxtın Qara Qarayev, Babək, Mikayıl Useynov prospektləri, eləcə də Məhəmməd Hadi, Məhəmməd Füzuli, Yusif Səfərov və Əhməd Rəcəbli küçələrində olan avtobus zolaqlarına daxil olaraq problem yaradırlar.
Mais Ağayev bildirib ki, ictimai qınaq obyektinə çevrilməmək üçün minik avtomobillərinin sürücüləri avtobus zolağının tələbinə riayət etməli, ictimai nəqliyyatın üstünlüyünə anlayışla yanaşmalıdırlar. Avtobus zolağının tələbinin pozulması inzibati məsuliyyət yaratmaqla yanaşı, həm də avtobusla hərəkət edən sərnişinlərə qarşı etinasızlıqdır.
Müntəzəm marşrut xətləri üzrə avtobusların rahat və maneəsiz hərəkətinin təmin edilməsi, gündəlik səfər sayı iki milyon iki yüz min olan ictimai nəqliyyat istifadəçilərin təyinat nöqtəsinə əlavə vaxt itkisi, əsəb və stress olmadan çatması baxımından avtobus zolaqlarının mövcudluğu mühüm əhəmiyyət kəsb edir.
Mais Ağayev qeyd edib ki, zolaqların təşkil edilməsi üçün seçilən küçə və prospektlər avtobusların hərəkət intensivliyi baxımından paytaxtın ictimai nəqliyyat dəhlizləri hesab olunur. Sadalanan yollardan gün ərzində yüz minlərlə ictimai nəqliyyat istifadəçisi hərəkət edir.
Qeyd edək ki, avtobus zolaqlarına daxil olan minik avtomobillərinin sürücüləri yol polisi tərəfindən 3 bal və 60 manat miqdarında cərimə oluna bilərlər.