Elçin Tağıyev 1989-cu il iyulun 1-də Biləsuvar rayonunun Zəhmətabad kəndində anadan olub.
Ucnoqta.az xəbər verir ki, Elçin Tağıyev 2004-2007-ci illərdə isə Cəmşid Naxçıvanski adına Hərbi Liseydə, 2007-2011-ci illərdə Heydər Əliyev adına Azərbaycan Ali Hərbi Məktəbində (AAHM) ali hərbi təhsil alıb.
Elçin Tağıyev 2011-ci ildən Azərbaycan Silahlı Qüvvələrinin Qusar rayonunda yerləşən "N" saylı hərbi hissəsində xidmət edirdi.
2016-cı ilin 2-5 aprelində baş verən Aprel döyüşləri zamanı dostu Ziya Həsənovun şəhid olmasından sonra Müdafiə Nazirliyinə müraciət edib və öz istəyi ilə hərbi xidmətini cəbhə bölgəsində davam edib.
Azərbaycan Ordusunun kapitanı olan Elçin Tağıyev 2020-ci il sentyabrın 27-də başlanan Vətən müharibəsi zamanı Talış qəsəbəsinin azadlığı uğrunda gedən döyüşlərdə iştirak edib.
O, bu döyüşlərdə yaralansa da, döyüş meydanından ilk növbədə yaralı əsgərlərin çıxarılmasını əmr edib.
Elçin Tağıyev oktyabrın 1-də Talış döyüşləri zamanı qəhrəmancasına şəhid olub. Ölümündən qabaq ona mayor hərbi rütbəsi verilmişdi.
O, Biləsuvar rayonunun Zəhmətabad kəndində dəfn olunub.
Azərbaycan Prezidenti İlham Əliyevin Sərəncamına əsasən Elçin Tağıyev ölümündən sonra "Qarabağ" ordeni və "Vətən uğrunda" medalları ilə təltif edilib.
Ailəli idi. 6 yaşlı Dəryanur, 3 yaşlı Tağı və 1 aylıq Məhəmməd adında üç övladı yadigar qaldı.