Birləşmiş Ərəb Əmirliklərinin (BƏƏ) 3 gün əvvəl Marsın orbitinə daxil olan “Amal” kosmik zondu qırmızı planetin səthinin ilk fotoşəklini Yerə göndərib.
Fotoşəkli sosial şəbəkədə paylaşan Dubay əmiri Şeyx Məhəmməd bin Rəşid Əl Məktum ərəb dünyasının ilk kosmik zondunun Marsın səthindən 25 min kilometr aralıda olduğunu yazıb. O əlavə edib ki, BƏƏ İslam aləmində qırmızı planetə kosmik missiya göndərən birinci, dünyada isə beşinci ölkədir.
“Amal” kosmik zondu Qırmızı planetin iqlimini və atmosferini tədqiq edəcək ən müasir cihazlarla təchiz edilib. Ozon qatı, buzluqlar, oksigen və hidrogenin səviyyəsini ölçmək üçün də xüsusi ultrabənövşəyi spektrometrlər quraşdırılıb. Bu zond ilk dəfə olaraq 687 gün davam edən Mars ili ərzində qırmızı planetin atmosferində baş verən dəyişikliklərin təsvirini Yerə göndərəcək.///publika.az