Sözləri Sona Vəliyevaya məxsus klipin təqdimatı keçirilib
Bu gün Beynəlxalq Mətbuat Mərkəzində "Bir az möhlət ver, Allahım" adlı klipin təqdimat mərasimi keçirilib. Trend-in məlumatına görə, tanınmış yazıçı Bəxtiyar Qaracanın layihə rəhbbərliyi ilə ərsəyə gələn klipin sözləri Sona Vəliyevaya, musiqisi isə Fəridə Mirişovaya məxsusdur. Klipin sujet xətti insanlığa hörmət, işgəncələrə, insanların öldürülməsinə son qoymaqdır. Klip bəşəriyyətin Allaha tapınması, insanların Allahdan möhlət istəyindən bəhs edir.
Əsərdə Şuşanın işğalı, Azərbaycan torpaqlarının düşmən tapdağında olması göstərilib.
Klipdə obrazları xalq artistləri Alim Qasımov, Nurəddin Mehdixanlı, Paralimpiya üzrə dünya çempionu İlham Zəkiyev və bəstəkar-xanəndə F.Mirişova canlandırıb.
Tədbirdə çıxış edən Azərbaycan Mətbuat Şurasının sədri, millət vəkili Əflatun Amaşov bildirib ki, klip yüksək peşəkarlıqla çəkilib. Klipin sözlərində insana insanlığı aşılayan ibrətamiz kəlamlar var.
Klipin bəstəkarı F.Mirişova bildirib ki, klipin sujet xətti bir insanın Allaha xitabı deyil, bəşəriyyətin Allahdan möhlət istəməsidir.
