Türkiyədə çevrilişə cəhd ölkə prezidenti Rəcəb Tayyib Ərdoğanın Qərbdən asılı olmayan müstəqil siyasət yürütməsi ilə bağlıdır.
Ucnoqta.az axar.az-a istinadən bildirir ki, bu sözləri öz İnstaqram səhifəsində Çeçenistan lideri Ramzan Kadırov paylaşıb.
Onun sözlərinə görə, çevrilişə cəhd edən generallar Qərbdən asılı olublar:
"Türkiyədə hərbi çevrilişə cəhdi edildi. Qiyamçılar təyyarə də daxil olmaqla müxtəlif hərbi texnikalardan da istifadə etdilər. Ölü və yaralılar var. Türkiyə bizim yaxın qonşumuzdur. Bu ölkə ilə çox sıx iqtisadi, mədəni və mənəvi əlaqələrimiz var. Türkiyənin Suriyadakı hadisələrə yanaşma tərzi dəyişdi. Bəzi şərhlərdə çevriliş cəhdinin Ərdoğanın ölkəni islamlaşdırmaq istəməsi və Osmanlı İmperiyasını yenidən qurmağa çalışması ideyasına hərbiçilərin qarşı olması ilə əlaqələndiriblər.
Bu, sadəcə, hadisələrə ötəri baxışdır. Yəqin ki, bu insanlar Osmanlı İmperiyasının sərhədlərinin haralara qədər uzandığını və Ərdoğan da daxil olmaqla heç kimin onu bərpa edə bilməyəcəyini anlamırlar. Əslində, türk generallar həmişə siyasətə qarışmağa və hakimiyyətə diktə etməyə öyrəşiblər. Bu cəhd Qərbə meyilli olan əsgələrin ideyasıdır".