Ticarət danışıqları zamanı ABŞ prezident administrasiyası Hindistan rəhbərliyindən Amerika onlayn pərakəndə satış şirkətləri, ilk növbədə "Amazon" və "Walmart" üçün daxili elektron ticarət bazarına pulsuz giriş əldə etməyə çalışır. Vaşinqton bunu müqavilə bağlamaq və maksimum 26% idxal rüsumunu tətbiq etməkdən imtina etmək üçün şərtlərdən biri kimi görür.
Ucnoqta.az xəbər verir ki, bu barədə Financial Times (FT) öz mənbələrinə istinadən məlumat yayıb.
Nəşrin qeyd etdiyi kimi, "Amazon" və "Walmart" sahibləri dəfələrlə Ağ Ev qarşısında həcmi 125 milyard dollar dəyərində qiymətləndirilən Hindistan elektron ticarət bazarına çıxış məsələsini qaldırıblar.
Qəzetin yazdığına görə, hazırda korporasiyaların rəhbərliyi Vaşinqtonun Hindistan rəhbərliyi ilə rəsmi danışıqları çərçivəsində Amerika administrasiyası ilə sıx əlaqə saxlayır.
Hazırda Amerika korporasiyaları Hindistanda yalnız məhdud bazar rejimində, müstəqil olaraq mal və xidmətləri satmaq imkanı olmadan fəaliyyət göstərə bilər.
Onlar həmçinin Hindistan tənzimləyiciləri və nəzarət orqanları tərəfindən çoxsaylı yoxlamalarla üzləşirlər.