Laçın dəhlizinin Ermənistandan keçən hissəsinin icrası istiqamətində iş gedir.
Erməni separatçılarının Qarabağdakı Rusiya sülhməramlılarının məsuliyyət zonasındakı nümayəndəsi Hayk Xanumyan bu zonanı Ermənistanla birləşdirəcək yolun yeni marşrutunun işinin təşkilinin təfərrüatlarını açıqlayıb.
Onun sözlərinə görə, yeni marşrutun Böyük Qaladərəsi, Kiçik Qaladərəsi, Göytala yaşayış məntəqələrindən keçərək Ermənistan sərhədinə gedən hissəsi artıq hazırdır.
“Eyni zamanda, sərhədin Ermənistan sərhədindən Sünik rayonunun Kornidzor kəndinə qədər olan 11 kilometrlik hissəsi hələ hazır deyil”, - o bildirib.
Xanumyan xatırladıb ki, avqustun 1-də Ermənistanda yolun tikintisi üçün tender keçirilib.
“Ehtimal olunur ki, mövcud yol bağlandıqdan sonra Ermənistanla sərhəddən gedən torpaq yolun 3-4 km-lik hissəsi müvəqqəti istifadəyə veriləcək. Ermənistanda həmin hissədə yol çəkilənə qədər bu, müvəqqəti həll yolu olacaq”, - deyə o əlavə edib ki, alternativ marşrut boyunca da lazımi infrastruktur tikilməlidir.
Xanumyan marşrutun dəyişdirilməsindən sonra tikinti işlərinin davam etdiriləcəyini də bildirib.
“Hazırda yol boyu kommunikasiya xəttinin və yüksək gərginlikli elektrik xəttinin çəkilməsi üçün layihələndirmə işləri aparılır. Laçın dəhlizinin indiki marşrutu boyunca mövcud olan infrastrukturun böyük hissəsi indi də Azərbaycanın nəzarətində olan ərazidən keçir. Ona görə də bütün bu məsələlərin həlli üçün müəyyən çeviklik və danışıqlara, eləcə də Rusiya sülhməramlılarının səmərəli iştirakı lazımdır”, - deyə o bildirib.
Xanumyan vurğulayıb ki, yeni marşrut dəhliz məntiqi ilə fəaliyyət göstərəcək: “5 kilometrlik hissə tamamilə Rusiya sülhməramlı qüvvələrinin nəzarəti altında olacaq. Yol Laçın-Zabux dəhlizinin fəaliyyət göstərdiyi yolun alternativi olaraq işləyəcək”.
Xatırladaq ki, 1992-ci ildə Ermənistan tərəfindən işğal olunmuş Laçın rayonunun Zabux kəndinin sakinləri avqustun 25-dək kəndi tərk etməlidirlər. Bundan sonra işğaldan azad edilən qəsəbə Azərbaycanın nəzarətinə keçəcək.///haqqin.az