Kamerunda hamilə qadın zəhərli ilan sancması nəticəsində həyatını itirməzdən əvvəl sağlam körpə dünyaya gətirib.
Ucnoqta.az xəbər verir ki, bu barədə New York Post qəzeti The New England Journal of Medicine tibbi elmi jurnalına istinadən məlumat yayıb.
Gürzə ailəsindən olan ölümcül zəhərli ilan Efa 25 yaşlı qadını 7 aylıq hamilə ikən dişləyib. Zərərçəkən vaginal qanaxma, qarın ağrısı və sancılar hiss etməyə başlayıb. Həkimlər xəstəni müayinə edərək onun qanında trombositlərin sayının az olduğunu və qanın laxtalanma sisteminin pozulması olan koaqulopatiya diaqnozunu qoyublar. Onların sözlərinə görə, simptomlar efa zəhərindən yaranıb.
Xəstəyə antidot verilib, lakin xəstəxanada qaldığı üçüncü gün çanaq nahiyəsində qanaxma və ağrılar güclənib və doğuş başlayıb. Bir gün sonra 3,4 kiloqram çəkisində sağlam oğlan uşağı dünyaya gəlib.
Doğuşdan sonra xəstənin vəziyyəti yaxşılaşmayıb. Qanaxma davam etdiyi üçün qadın başqa bir müəssisəyə köçürülüb və həkimlər ona kəskin böyrək çatışmazlığı diaqnozu qoyublar. Həkimlərin səyinə baxmayaraq, xəstəni xilas etmək mümkün olmayıb.
Efa zəhəri açıq bir hemolitik təsirə malikdir və insanlar üçün təhlükəlidir. Bu ilanlar Şimali Afrika və Asiyada yayılmışdır. Yetkin fərdlərin uzunluğu 90 santimetrə çata bilər.