AXCP sədrinin müavini Gözəl Bayramlı barəsində çıxarılan hökmdən apellyasiya şikayəti verilib.
"Ucnoqta.az" xəbər verir ki, bu barədə “Ölkə.Az”a Gözəl Bayramlının vəkili Elçin Sadıqov açıqlama verib.
O, deyib ki, hökmdən verilən şikayət araşdırılması üçün Gəncə Apellyasiya Məhkəməsində hakim Teyyub Muxtarovun icraatına verilib.
İlkin baxış iclası fevralın 28-nə təyin edilib.
Qazax rayon Məhkəməsinin hökmü ilə Gözəl Bayramlı 3 il müddətinə azadlıqdan məhrum edilib.
İttihama görə, Gözəl Bayramlı 25 may 2017-ci il tarixdə saat 22 radələrində Gürcüstandan Azərbaycan ərazisinə keçərkən Qazax rayonunun Şıxlı sərhəd-nəzarət buraxılış məntəqəsində saxlanılıb.
Özünü şübhəli apardığına görə onun əl yükünə baxış keçirilərkən bəyan edilməmiş 12 min ABŞ dolları məbləğində pul vəsaiti aşkar olunaraq götürülüb.
İlkin araşdırmalarla Gözəl Bayramlının 24 may 2017-ci il tarixdə Azərbaycandan Gürcüstana gedərkən üzərində bəyan edilməli olan nağd pul vəsaiti olması müəyyən edilməyib.
Gözəl Bayramlı Cinayət Məcəlləsinin 206.1-ci (qaçaqmalçılıq) maddəsi ilə ittiham edilir.