Ukrayna Azərbaycanlıları Birləşmiş Diasporunun (UABD) sədri Hikmət Cavadov təşkilatın fəxri üzvü, Xocalı qətliamının ilk şahidi, jurnalistləri bu vəhşiliyin törədildiyi yerə helikopterlə aparan ukraynalı pilot Kraveç Leonid Markoviçi “Cavad Xan” Ordeni ilə təltif edib.
"Ucnoqta.az" "Ölkə.Az"a istinadən xəbər verir ki, Kraveç Leonid Markoviç Azərbaycan naminə fəaliyyətində fərqləndiyi üçün təltif olunub.
Qiymətli metaldan hazırlanmış “Cavad Xan” Ordeni 1, 2 və 3-cü dərəcəlidir. Orden yaşadığı ölkədən və milliyyətindən asılı olmayaraq Azərbaycan naminə fəaliyyətində fərqlənən insanlara təqdim olunur. Hazırda Leonid Kraveç Ukraynada olmadığından ordenin təqdim etmə mərasimi martın əvvəllərinə planlaşdırılıb.
Xatırladaq ki, Xocalı qətliamının ilk şahidi Kraveç Leonid Markoviç UABD sədri Hikmət Cavadovun təşəbbüsü ilə Bakıda olub, Heydər Əliyev Mərkəzində filmin təqdimatında iştirak edib. Filmin həmçinin Moskvada və Kiyevdə böyük auditoriya qarşısında nümayiş etdirilib. Xocalı faciəsinin dəhşətlərindən bəhs edən “Cəhənnəmi görmüş pilot” filmində Leonid Kravets hadisələri gördüyü kimi nəql edir, lazım olacağı təqdirdə beynəlxalq məhkəmələrdə şahid kimi çıxış edəcəyini bildirir.
Film UABD tərəfindən Leyla Əliyevanın təşəbbüsü ilə “Xocalıya ədalət!” beynəlxalq kampaniyası çərçivəsində hazırlanıb.
2016-cı ildə Prezident İlham Əliyev Markoviçin xidmətlərini yüksək qiymətləndirərək onu “Tərəqqi” medalı ilə təltif edib.
Kraveç Leonid Markoviç Gəncədə hərbi xidmətdə olub, yaşayıb və məhz 24 il əvvəl Xocalıya Gəncədən uçub.