Nazir Səlim Müslümov müharibə veteranları və əlillərlə görüşüb

Əmək və Əhalinin Sosial Müdafiəsi Nazirliyində “Azərbaycan Qarabağ Müharibəsi Əlilləri, Veteranları və Şəhid ailələri”, “20 Yanvar”, “Azərbaycan Çernobıl Əlilləri İttifaqı”, “Azərbaycan Vətən Müharibəsi Veteranları”, “Vətən Fədailərinin Hüquqlarının Müdafiəsi”, “Azərbaycan Gözdən Əlillər Cəmiyyəti” və “Əfqanıstan Müharibəsi Veteranları” İctimai Birliklərinin rəhbər şəxsləri ilə görüş olub.
 
Ucnoqta.az Nazirliyin İctimaiyyətlə əlaqələr şöbəsindən “APA-Economics”ə verilən məlumata istinadən bildirir ki, bundan əvvəl nazirlikdə “Qarabağ qaziləri” və “Vətən Müharibəsi Əlilləri” İctimai Birliklərinin sədrləri ilə də görüş keçirilib.
 
Qarabağ müharibəsi,  20 Yanvar, Çernobıl əlilləri və gözdən əlillər, şəhid ailələri və müharibə veteranları ilə bağlı ictimai birliklərin rəhbərləri ilə görüşdə əmək və əhalinin sosial müdafiəsi naziri Səlim Müslümov Azərbaycan prezidenti İlham Əliyevin sosial cəhətdən həssas əhali qruplarına xüsusi diqqət və qayğısının əlil və şəhid ailələrinin, müharibə veteranlarının sosial müdafiəsinin gücləndirilməsi istiqamətində məqsədyönlü addımların atılmasına imkan yaratdığını vurğulayıb.
 
Nazir bildirib ki, mühüm sosial proqramlardan biri kimi, ötən dövrdə 6,1 min nəfər əlil və şəhid ailəsinin Əmək və Əhalinin Sosial Müdafiəsi Nazirliyi tərəfindən mənzillə təminatı həyata keçirilib. Mənzillə təmin edilən əlilliyi olan şəxslərin sırasında Qarabağ müharibəsi əlilləri ilə yanaşı, Çernobıl AES əlilləri, gözdən əlillər də var. Dövlət başçısının tapşırığına uyğun olaraq, növbəti illərdə də bu proqram uğurla davam etdiriləcək.
 
Müharibə əlillərinin minik avtomobilləri ilə təmin olunması tədbirlərini diqqətə çatdıran S.Müslümov qeyd edib ki, bu təbəqədən olan əlillərin, 20 Yanvar və Çernobıl AES əlillərinin sosial müavinət və ya əmək pensiyası ilə yanaşı, onların, habelə şəhid ailələrinin Azərbaycan Prezidentinin aylıq təqaüdləri ilə təminatı da həyata keçirilir. Eyni zamanda, I qrup əlilliyi olan şəxslərdən, o cümlədən I qrup gözdən əlillərdən aylıq sosial müavinət alanlara, Əfqanıstanda sovet qoşunlarının tərkibində beynəlmiləl borcunu yerinə yetirərkən həlak olan, itkin düşmüş və məhkəmə qaydasında ölmüş elan edilən hərbi qulluqçuların ailə üzvlərinə  Prezidentin aylıq təqaüdü ödənilir. Müharibə əlilləri və onlara bərabər tutulanların, şəhid ailələrinin uşaqları, müharibə veteranları, o cümlədən Əfqanıstan müharibəsi veteranları aylıq  sosial müavinətlərlə təmin edilirlər.
 
Bütün bu sosial ödənişlərin də ötən dövrdə mütəmadi olaraq artırıldığını bildirən S.Müslümov müharibə əlillərinin, 20 Yanvar, Çernobıl əlillərinin və gözdən əlillərin tibbi-sosial reabilitasiyası sahəsində müvafiq işlərin aparıldığını, onlar üçün reabilitasiya infrastrukturunun müasir tələblərə uyğun qurulduğunu diqqətə çatdırıb. Nazir həmin insanlarla bağlı ictimai qurumlarla sıx əməkdaşlıq həyata keçirildiyini, aidiyyəti qanunvericilik aktlarının təkmilləşdirilməsi işlərində onların da yaxından iştirakına şərait yaradıldığını, onlarla nazirlikdə müntəzəm görüşlərin təşkil olunduğunu qeyd edib.  S.Müslümov belə görüşlərin, o cümlədən hazırda keçirilən görüşün müvafiq sahələrdə görülən və planlaşdırılan işlər barədə həmin ictimai birliklərin  rəy və təkliflərinin öyrənilməsi baxımından önəmli olduğunu vurğulayıb.
 
Görüşdə qeyd olunan ictimai birliklərin rəhbərlərinin müraciətləri, eləcə də ayrı-ayrı qanunvericilik aktlarında dəyişiklik edilməsi ilə bağlı təklifləri dinlənilib. Müraciətlərdə əksini tapan məsələlər  müzakirə olunub, səslənən təkliflərlə bağlı müvafiq araşdırmaların aparılması barədə nazirliyin aidiyyəti struktur bölmələrinin rəhbərlərinə tapşırıqlar verilib.