Məleykə Abbaszadə: “Yaz imtahanlarında 10 min nəfər yüz baldan aşağı nəticə göstərib”

 “I qrup üzrə yaz imtahanında iştirakçıların 50 faizdən çoxu təxminən 162 bal, yay imtahanı iştirakçılarının isə yarıdan çoxu 193 bal nəticə göstərib. Yəni, bir az da olsa artım olub. Göstəricilər müəyyən qruplar üzrə eyni qalsa da, III qrupda yaxşılaşıb”. Ucnoqta.az “Report”a istinadən xəbər verir ki, bunu Dövlət İmtahan Mərkəzinin (DİM) Direktorlar Şurasının sədri Məleykə Abbaszadə deyib.
O bildirib ki, yaz imtahanlarında iştirak edən 65 min insanın 53 mini ikinci dəfə yay imtahanına da yazılıb: “Yay imtahanı üçün yazılan 10 min nəfərin ilkin nəticələri bizdə yox idi, çünki yaz imtahanında iştirak etməmişdilər. Builki qəbul imtahanlarının özəlliyini nəzərə alsaq, onlara iki dəfə şans verdik. Təqribən 10 min nəfər yay imtahanına yazılmadı. Bu da 100 baldan aşağı nəticə göstərənlər idi. Təbii ki, istisna hallar da var idi, bu da yaz imtahanlarında, yəni ilk şanslarında 700 bal toplayan abituriyentlər olub və onların ikinci şansa ehtiyacı yox idi”.
DİM sədri qeyd edib ki, II qrupda yaz imtahanında 18 343 iştirakçıdan 50 faizi 204 bal, yay imtahanında 17 321 iştirakçıdan yarıdan çoxu 216 bal, III qrupda ilk mərhələdə 16 360 iştirakçıdan 50 faizi 215 baldan yuxarı, ikinci mərhələdə 15 590 nəfərin yarıdan çoxu 264 bal, IV qrupda isə ilk şansda 4 455 nəfərin 50 faizi 266, ikinci şansda 4 248 nəfərdən yarısı 334 bal toplayıb.
Ən yüksək nəticənin müsabiqə zamanı nəzərdə alındığını deyən M.Abbaszadə əlavə edib ki, hansı nəticə ilə ixtisas seçimi etməyini abituriyent özü seçəcək: “Çünki abituriyent ola bilsin ki, yay imtahanında 300 bal toplayıb, lakin iki fəndən lazım olan nəticəni göstərə bilməyib. Ona görə də dövlət sifarişli yerlərin müsabiqəsində iştirak edə bilməz. Lakin yaz imtahanında 260 bal toplasa da məhdudiyyəti yerinə yetirib və fənn məhdudiyyəti vacibdir. Bu zaman seçimini özü edə bilər”.