Yuanın məzənnəsi 6 illik minimuma enib

 Çin milli valyutası – yuanın məzənnəsi ABŞ dolları ilə müqayisədə 6,7069 CNY/USD səviyyəsinə kimi geriləyərək son 6 ilin minimumuna enib. "Report"un "Bloomberg" agentliyinə istinadən xəbər verir ki, yuan oktyabrın 1-də Beynəlxalq Valyuta Fondunun (İMF) əsas valyuta səbətinə daxil olduqdan sonra Çin Xalq Bankı (ÇXB, Mərkəzi Bank) ilk dəfə yeni məzənnə açıqlayıb. Belə ki, Çində oktyabrın 1-dən 10-dək rəsmi bayram günləri olub.
Qeyd edək ki, Çin rəsmiləri yuanın uzunmüddətli devalvasiyası üçün heç bir əsasın olmadığını dəfələrlə təkrarlayıblar. Həmçinin, valyuta məzənnəsinin formalaşdırılması mexanizmində islahatların aparılacağı bildirilib.
Xatırladaq ki, Çində valyuta məzənnəsi 2005-ci ilə qədər uzun müddət 8,3 CNY/USD səviyyəsində olub. Daha sonra möhkəmlənməyə başlayan yuan, 2014-cü ilin yanvar ayında məzənnənin 6 CNY/USD səviyyəsinə çatmasına səbəb olub. Bundan sonra qlobal maliyyə böhranının təsiri ilə zəifləməyə başlayan Çin milli valyutası 2015-ci ilin avqustunda ÇXB tərəfindən 4% devalvasiya edildikdən sonra qlobal maliyyə bazarları daha da çətin vəziyyətə düşüb. Son bir il ərzində isə ÇXB valyuta ehtiyatlarını xərcləyərək məzənnənin sabitliyini qoruyub saxlayıb. Belə ki, sentyabr ayı ərzində Çinin rəsmi valyuta ehtiyatları 19 mlrd. ABŞ dolları azalaraq son 5 ilin minimal səviyyəsi – 3,166 trln. dollara kimi geriləyib. İlin əvvəlindən isə yuanın dollarla müqayisədə 2,7% ucuzlaşdığı bildirilir.
"Report"un analitik qrupu Çin milli valyutasının tədricən ucuzlaşacağını və bunun bütün ölkələrə yayılacağını proqnozlaşdırır. 2020-ci ilə qədər CNY/USD məzənnəsinin yenidən 8,3 səviyyəsinə çatacağı ehtimal edilir.