Regionlarda yaşayan gənclərin sahibkarlıq fəaliyyətinə cəlb edilməsi, onların yeni biznes imkanları barədə məlumatlandırılması məqsədilə Masallı rayonunda maarifləndirici tədbir keçirilib.
Ucnoqta.az xəbər verir ki, 11 noyabr 2026-cı il tarixində Masallı Heydər Əliyev Mərkəzində Azərbaycan Respublikasının Gənclər Fondunun maliyyə dəstəyi ilə “Üfüq” Gənclərin İnkişafı Naminə İctimai Birliyinin həyata keçirdiyi “Gənc Sahibkarların İnkişaf Proqramı” layihəsi çərçivəsində təşkil olunan təlimdə 60 nəfər gənc iştirak edib.
Layihə rəhbəri Həzrət Bədiyev çıxışında gənclərin sahibkarlıq sahəsində uğur qazanması üçün bilik və təcrübə ilə yanaşı, davamlı öyrənmə və təşəbbüskarlığın da mühüm rol oynadığını bildirib. O vurğulayıb ki, hər bir gəncin öz biznes ideyasını həyata keçirmək potensialı var və bunun üçün ilk növbədə düzgün istiqamət, maarifləndirmə və dəstək mexanizmləri vacibdir. H.Bədiyev layihənin həyata keçirilməsinə göstərdiyi maliyyə dəstəyinə görə Azərbaycan Respublikasının Gənclər Fonduna təşəkkürünü ifadə edib.
Təlimçi Orxan Məmmədov iştirakçılarla biznes ideyasının yaranmasından onun reallaşdırılmasına qədər olan mərhələləri müzakirə edib. Gənclərə startapların idarə olunması, rəqabət mühitinin təhlili, marketinq alətlərindən istifadə, satışın təşkili və biznes fəaliyyətində risklərin qiymətləndirilməsi barədə məlumat verilib.
Tədbirdə xüsusilə regionlarda mövcud olan iqtisadi potensialdan istifadə, yerli məhsul və xidmətlərin təşviqi, gənclərin fərdi təşəbbüslərinin biznes imkanlarına çevrilməsi məsələləri ön plana çəkilib.
İştirakçılar təlim müddətində mövzularla bağlı suallar ünvanlayıb, sahibkarlıq fəaliyyətinə başlamaq üçün lazım olan bilik və bacarıqlar barədə müzakirələrdə fəal iştirak ediblər.
“Gənc Sahibkarların İnkişaf Proqramı” layihəsi gənclərin nəzəri biliklərlə yanaşı, gələcəkdə öz biznes təşəbbüslərini formalaşdırmaq üçün praktiki düşüncə və bacarıqlar qazanmasını hədəfləyir. Lənkəran və Masallı mərhələləri çərçivəsində ümumilikdə 120 gənc layihədən faydalanıb.
