Türkiyə Prezidenti Rəcəb Tayyib Ərdoğan ABŞ-ı ölkəsinin əsas mayeləşdirilmiş təbii qaz (LNG) tədarükçüsü adlandırıb və enerji sahəsində, o cümlədən nüvə enerjisi istiqamətində əməkdaşlığın genişləndirilməsinin vacibliyini bildirib.
Ucnoqta.az xəbər verir ki, Ərdoğan bu barədə Nyu-Yorkda işgüzar dairələrin nümayəndələri ilə görüşündə danışıb.
“Bu gün Amerika bizim əsas LNG tədarükçümüzdür. Beləliklə, biz Avropada Amerika qazına üstünlük verən aparıcı ölkələr sırasındayıq. Bu əməkdaşlığı nüvə enerjisi də daxil olmaqla, energetikanın bütün sahələrinə genişləndirməyə çalışırıq”, – Ərdoğan deyib.
Türkiyə lideri ABŞ-la iqtisadi münasibətlərin yalnız ticarət göstəriciləri əsasında qiymətləndirilməsinin düzgün olmadığını bildirib.
Onun sözlərinə görə, regional münaqişələr başa çatdıqdan sonra təchizat zəncirlərinin yenidən qurulması da daxil olmaqla, bir sıra əsas istiqamətlərdə işlər sürətlənəcək.
Ərdoğan Türkiyənin inkişaf etmiş sənaye infrastrukturu və Avropa İttifaqı ilə Gömrük İttifaqı çərçivəsində geniş azad ticarət şəbəkəsinə malik olduğunu vurğulayıb.