Azərbaycanda külli miqdarda vergi borcu olan türkiyəli iş adamı 20 min manat cərimələnib.
Qaynarinfo-nun məlumatına görə, "Taha İnşaat" Məhdud Məsuliyyətli Cəmiyyətinin direktoru və qanuni təmsilçisi Eyyup İnak barəsində İnzibati Xətalar Məcəlləsinin 192.1-ci maddəsi ilə protokol tərtib edilib və iş məhkəməyə göndərilib.
Türkiyəli iş adamı barəsində Zəngilan rayon prokuroru, ədliyyə müşaviri Qibləli Kərimov araşdırma aparıb. Məlum olub ki, Eyyup İnakın Zəngilan rayonu, Ağbənd qəsəbəsi ərazisində tikinti işlərini həyata keçirən şirkəti fərdi sahibkar kimi işçiləri işə götürüb.
Məhkəmənin qərarı ilə Eyyup İnak İnzibati Xətalar Məcəlləsinin 192.1-ci maddəsində nəzərdə tutulmuş inzibati xətanı törətməkdə təqsirli bilinib və barəsində 20.000 manat məbləğində cərimə növündə tənbeh tədbiri tətbiq edilib.
Cərimə İnzibati Xətalar Məcəlləsinin 192.1-ci (Azərbaycan Respublikasının Əmək Məcəlləsində nəzərdə tutulmuş qaydada əmək müqaviləsi (kontraktı) hüquqi qüvvəyə minmədən işəgötürən tərəfindən fiziki şəxsləri hər hansı işlərin (xidmətlərin) yerinə yetirilməsinə cəlb edilməsinə görə fiziki şəxslər min manatdan iki min manatadək məbləğdə, vəzifəli şəxslər üç min manatdan beş min manatadək məbləğdə, hüquqi şəxslər iyirmi min manatdan iyirmi beş min manatadək məbləğdə cərimə edilir) maddəsinə əsasən tərtib olunub.
Qeyd edək ki, nizamnamə kapitalı 100 manat olan "Taha İnşaat" Məhdud Məsuliyyətli Cəmiyyətinin İqtisadiyyat Nazirliyi yanında Dövlət Vergi Xidmətinin Bakı şəhəri Lokal Gəlirlər Baş İdarəsinə 168939.28 AZN vergi borcu var.