"Mərkəzi Bank sədrinin inflyasiyanın aşağı düşməsi ilə bağlı açıqladığı rəqəmlər qiymətlərin aşağı düşməsini yox, artma sürətinin aşağı düşməsini göstərir".
Ucnoqta.az xəbər verir ki, bu sözləri Valyuta.az-a iqtisadçı Xalid Kərimli Azərbaycanın Mərkəzi Bankının (ABM) sədri Taleh Kazımovun ərzaq və qeyri-ərzaq inflyasiyası ilə bağlı açıqladığı rəqəmləri şərh edərkən deyib.
Xalid Kərimli deyib ki, ABM sədri bilərəkdən orta illik inflyasiyanı göstərmir:
"Məsələnin bir neçə tərəfi var. Burda rəqəmlər açıqlandığı aylarla ötən ilin müvafiq ayının müqayisəsi göstərilib. Bu rəqəmlərlə bağlı digər statistik məlumatı Statistika Komitəsi elan edir. Orta illik inflyasiya göstəricisi sentyabr ayında ölkə üzrə 10.9 faizdir. Güman edilir ki, bu ilin sonuna qədər 9.5-10 faiz arasına düşəcək. Hələdə inflyasiya rəqəmləri iki rəqəmlidir.
Mərkəzi Bankın sədri bu inflyasiyanı bizə yaxşı göstərməyə məcburdur. Ona görə də özünə sərf edən göstəricini ön plana çəkir. Lakin bu rəqəmlərlər bu ilin sentyabrı ilə keçən ilin sentyabrı arasındakı qiymət fərqini bizə göstərir. Biz isə bu ili yaşadığımıza, xərclərimiz isə il üzrə olduğuna görə, sədr orta illik inflyasiyanı da elan etməlidir".
Ekspert deyib ki, nə ərzaq, nə də qeyri-ərzaq məhsullarında qiymətlər aşağı düşməyəcək:
"Qiymətlərin ucuzlaşması defilyasiya prosesidir. Qarşıdakı illərdə isə ölkədə defilyasiya gözlənilmir. Gələn il də inflyasiya davam edəcək, iki rəqəmli olmayacaq. Amma artım sürətlə davam etməyəcək. Məsələn, 100 manata aldığımız 103 manat olacaq, 97 manat olmayacaq".
Bundan əvvəl AMB sədri bildirib ki, 2023-cü ilin sonuna kimi ÜDM-nin 1,5% artımı proqnozlaşdırılır: "Ərzaq inflyasiyası 4,5 %, qeyri-ərzaq inflyasiyası 5,9 % olub. İllik baza inflyasiya sentyabrda azalıb. Mərkəzi Bank səlahiyyəti çərçivəsində inflyasiyanı azaltmağa çalışıb".