Paytaxt sakinləri metrodakı havasızlıqdan, istidən də gileyləniblər. Son vaxtlar metroda tez-tez səhhəti pisləşən sərnişinlərə rast gəlinir. Metropoliten üçün yeni kondisionerli qatarlar alınır, yenidənqurma işləri aparılır. Bəs vaqonlarda sərinlik yaradan kondisionerli qatarlar stansiyalarda havasızlığa səbəb ola bilərmi? Bu və digər suallarla nəqliyyat eksperti Elməddin Muradlıya müraciət etdik.
Ekspert Ucnoqta.az-a bildirdi ki, metroda havalandırma sistemi ilə bağlı hər şey yüksək səviyyədədir demək olmaz.
"Çünki problemlər var. Bunun da məsuliyyəti metronun köhnə rəhbərliyinin üzərindədir. Tağı Əhmədov Metronun inkişafı üçün ciddi işlər görməyib. Bir adam ki, bir gecədə Akif Çovdarova 3 milyon çatdırıb, o, metro inkişaf etməyəcək".
Ekspert vurğulayıb ki, ümumiyyətlə metroda havalandırma çox ciddi məsələdir:
"Havasızlıq vətəndaşlarda ciddi problemlər yaradır və metroya qarşı inamsızlıq yaranır. Biz insanları ictimai nəqliyyata qaytarmaq üçün çalışdığımız dövrdə belə vəziyyətin yaranması arzuolunan deyil. Metroda ciddi islahatlara ehtiyac var. Təəssüf ki, Azərbaycanın müstəqllik dövründə 30 ildə metro stansiyalarının sayı 30-a çatmayıb. Belə zəif inkişaf digər heç bir sahədə yoxdur. Metronun inkişafı strateji məsələ kimi qarşıya qoyulub məşğul olunmalıdır. Metro ictimai nəqliyyatın həm təhlükəsiz həm də daha rahat növüdür. Metronun inkişfı ilə bağlı kompleks tədbirlər həyata keçirilməlidir".