Azərbaycanda taksidən istifadə edənlərin sayında son vaxtlar artım müşahidə olunur.
Cari ilin yanvar-sentyabr aylarında nəqliyyat sektorunda daşımaların həcmində xüsusi çəkisi ən böyük olan avtomobil nəqliyyatı ilə 94,7 milyon ton yük, 1 200,2 milyon sərnişin daşınıb. Dövlət Statistika Komitəsindən bildirilib ki, əvvəlki ilin müvafiq dövrü ilə müqayisədə 5,2% və 18,4% artım qeydə alınıb.
Sərnişinlərin 94,7%-i avtobus, 5,3%-i isə taksilərin xidmətlərindən istifadə edib. Yük dövriyyəsi 5%, sərnişin dövriyyəsi isə 18% artıb.
Bəs görəsən, bu taksi qiymətlərinə təsir edə bilərmi? Taksiyə müraciətlərin sayının artması nə ilə bağlıdır? Ötən illərlə müqayisə etsək, hansı məqamlar ortaya çıxa bilər?
Mövzu ilə bağlı Oxu.Az-a açıqlama verən nəqliyyat məsələləri üzrə ekspert Eldəniz Cəfərov başlıca səbəbi mövsümlə əlaqələndirib:
“İctimai nəqliyyatın ən kütləvi seqmenti bu gün avtobusdur. Avtobuslar daha çox sərnişin daşıyırlar. Taksilərin də son vaxtlar sərnişindaşımada payının artmasının mövsümlə əlaqəli olduğunu düşünürəm. Yay mövsümündə tətillər olduğu üçün ictimai nəqliyyatdan istifadə indiyə nisbətən zəif idi. Həmçinin taksidən də az istifadə edirdilər.
Lakin sentyabr ayından məktəb və universitetlər açılıb. Nəticədə insanların hərəkəti artıb. Bu da öz növbəsində ictimai nəqliyyat vasitələrinə olan tələbatı daha da artırır”,
Ekspert qeyd edib ki, ölkəmizdə ictimai nəqliyyat çoxşaxəli deyil:
“Bakı şəhərində ictimai nəqliyyat o qədər də çoxşaxəli deyil. İctimai nəqliyyat yalnız metro və avtobusdan ibarətdir. Burada taksinin də payı nəzərəçarpacaq dərəcədədir. Taksi ictimai nəqliyyatın yükünün bir qismini öz üzərinə götürə bilir. Bakı və ətraf ərazilərdə bu səbəbdən taksiyə tələb daha çoxdur”.
“Taksiyə tələbin çox olması ilə yanaşı minik avtomobillərin də sayı yetərincədir. Taksi fəaliyyəti ilə məşğul olan şirkətlərin sayı da ildən-ilə artır. Taksidə fəaliyyət göstərən vətəndaşların da sayı kifayət qədər çoxdur. Ona görə balans yaranır. Tələb və təklif bir-birini tənzimləyir. Taksilərin yaxın vaxtlarda qiymətlərin yüksələcəyini düşünmürəm”, – deyə E.Cəfərov əlavə edib.
Qeyd edək ki, “Avtomobil nəqliyyatı haqqında” qanunda edilmiş dəyişikliklər oktyabr ayının 1-dən etibarən tətbiq edilib. Yeni qaydalara əsasən, Azərbaycanda taksi kimi istifadə olunan avtomobillərə məcburi şəkildə taksometr quraşdırılmalıdır.
Belə ki, minik avtomobillərində onların qət etdiyi məsafənin, boşdayanmanın müddətinin uçotunun aparılması, gediş haqqının məbləğinin hesablanması və bu barədə sərnişinin məlumatlandırmasını təmin edən, taksi üçün nəzərdə tutulmuş fiskal yaddaşlı xüsusi cihaz (taksometr) və proqram təminatı olmalıdır.