Sosial şəbəkədə Bakının Xətai rayonu, 3 saylı uşaq evi ilə bağlı videoşikayət yayılıb.
Görüntülərdə müəssisədə qalan yeniyetmələrdən biri iddia edib ki, orada uşaqlar normal qidalandır, onlara quru çörək verirlər. Uşaq evinə gələn ərzaq onlara çatdırılmır: “Uşaq evinə gələn ərzağı aparırlar. Əti bişirirlər, sümüyünü bizə verirlər, özünü aparırlar. Meyvələri, südü aparırlar”.
Həmçinin görüntüləri yayılan yeniyetmənin sözlərinə görə, məktəbin direktoru onun ömürlük psixi sağlamlıq mərkəzinə yerləşdirilməsi üçün polis bölməsinə müraciət edib və telefonunu əlindən alıb.
Sosial şəbəkədə yayılan ittihamlarla bağlı 3 saylı uşaq evinin müdiri Məhbubə Hüseynova “Qafqazinfo”ya bildirib ki, həmin müəssisədə tərbiyə alan yeniyetmənin uşaq evində guya yeməklə bağlı problemlərinin mövcudluğuna dair səsləndirdiyi fikirlər tam əsassızdır: “2006-ci il təvəlludlu H.M. dəfələrlə uşaq evinin intizam qaydalarını kobud şəkildə pozub və ona dəfələrlə xəbərdarlıqlar edilib. Azyaşlının müəyyən psixiki problemləri olduğundan 2020-ci ildə Respublika psixiatriya xəstəxanasıhda (emosiya və davranışın pozuluşu diaqnozu ilə) müalicə olunub.
2018-ci ildə bir ailə tərəfindən övladlığa götürülməyinə baxmayaraq 2020-ci ildə həmin ailə məhkəmə qaydasında ondan imtina edib. İmtinaya səbəb onun ailə daxilində özünü apara bilməməsi və digər qanunazidd əməllər törətməsi olub. Həmçinin 2021-ci ildə doğma qardaşı onu uşaq evindən götürərək öz evinə aparıb və bir müddətdən sonra eyni səbəblərdən uşaq evinə qaytarıb”.
Uşaq evinin müdiri həmçinin əlavə edib ki, yeniyetmə martın 23-də ərazi üzrə polis əməkdaşları tərəfindən Respublika Psixiatriya Xəstəxanasına aparılaraq ora təhvil verilib.