Ümumdünya Heyvan Sağlamlığı Təşkilatının məlumatına əsasən, Fransa Respublikasının Reünyon regionunda, Niderland Krallığının Drente əyalətində, Almaniya Federativ Respublikasının Şlezviq-Holşteyn vilayətində, İngiltərənin Şərqi İngiltərə və Cənub-Şərqi İngiltərə regionlarında, Amerika Birləşmiş Ştatlarının Nebraska və Alyaska ştatlarında yüksək patogen quş qripi xəstəliyi qeydə alınıb.
Bu barədə Ucnoqta.az-a Azərbaycan Qida Təhlükəsizliyi Agentliyindən (AQTA) məlumat verilib.
Respublika ərazisinin başqa ölkələrdən keçə biləcək yoluxucu heyvan xəstəliklərindən qorunması məqsədilə qeyd olunan ərazilərdən WOAH-nin “Quruda yaşayan heyvanların sağlamlıq Məcəlləsi”nə əsasən, zonalaşma prinsipi nəzərə alınmaqla, diri quş və inkubasiya yumurtalarının, quş ətinin, tərkibində quş emalı məhsulları olan quş ətindən və bütün növ quşçuluq məhsulundan alınan hazır ət məhsullarının (quş qripi viruslarının məhv edilməsini təmin edən termik emala məruz qalan mallar istisna olmaqla), quş yemləri və quş üçün yem əlavələrinin (bitki mənşəli, kimyəvi və mikrobioloji sintez yolu ilə alınmış yemlər və yem əlavələri istisna olmaqla), quşların saxlanması, kəsilməsi və emalı üçün istifadə olunmuş avadanlıqların idxalına və ölkə ərazisindən tranzit daşınmasına müvəqqəti məhdudiyyət tətbiq olunub.
Eyni zamanda nəzarət tədbirlərinin gücləndirilməsi məqsədilə Fransa Respublikasının Reünyon regionundan, Niderland Krallığının Drente əyalətindən, Almaniya Federativ Respublikasının Şlezviq-Holşteyn vilayətindən, İngiltərənin Şərqi İngiltərə və Cənub-Şərqi İngiltərə regionlarından, Amerika Birləşmiş Ştatlarının Nebraska və Alyaska ştatlarından gələn, yaxud tranzitlə keçən nəqliyyat vasitələri ilə bağlı müvafiq tədbirlərin görülməsi üçün Azərbaycan Respublikasının Dövlət Gömrük Komitəsinə müraciət olunub.