"Delta" və "Delta+" ştammları dünyada daha geniş yayılarsa, bu, yeni bir pandemiyanın, yaxud qorxulu dördüncü mərhələnin başlanğıcı ola bilər.
Ucnoqta.az xəbər verir ki, bunu Trend-ə açıqlamasında tibb elmləri doktoru Adil Qeybulla deyib.
O, "Delta" və "Delta+" variantlarının koronavirusdan fərqli olaraq konkret əlamətlərə malik olduğunu vurğulayıb.
"Britaniya ştammı "Alfa"dır, Cənubi Afrika "Betta", Braziliya "Qamma" və Hindistan ştammı "Delta" adlanır. Bu ştammlar pandemiyanın ayrı-ayrı mərhələlərində fəallaşıblar. Hazırda 92 ölkədə Hindistan ştammının olması müəyyən edilib. "Delta" ştammının "Delta+" variantı daha aqressiv, göstəriciləri daha yüksək olan bir variantdır. Koronavirus subklinik formada, yəni əlamətsiz keçirdisə, bunun konkret əlamətləri var. Bu ştamma yoluxanlarda mədə-bağırsaq problemi, yüksək temperatur, boğazda ağrılar kimi əlamətlər özünü göstərir".
Adil Qeybulla qeyd edib ki, uşaqlar arasında da geniş yayıldığı haqda məlumatlar var. Bu səbəbdən Ümumdünya Səhiyyə Təşkilatı artıq uşaqların da vaksinasiyasını vacib hesab edir: "Təəssüf ki, ayrı-ayrı ölkələrdə, o cümlədən bizdə də insanlar elə bilir ki, karantin artıq bitib. Amma pandemiya hələ bitməyib, proses davam edir. ÜST karantinin son zəngi vurana qədər ehtiyatlı olmalıyıq. Qapalı mühitdən, təmaslardan yayınmalıyıq".