2014-cü ilin martında yoxa çıxan Malayziya Hava Yollarına məxsus təyyarənin axtarışları mövsümi hava dəyişikliyi səbəbindən 2025-ci ilin sonuna qədər təxirə salınıb.
Ucnoqta.az xəbər verir ki, bu barədə “Star” qəzeti məlumat yayıb.
Məlumata görə, MH370 reysinin sərnişinləri və ekipaj üzvlərinin ailələri birliyi bildirib ki, bu, mövsümi hava dəyişiklikləri və daha əvvəl axtarışda öz gəmilərindən istifadə etməyə hazır olduğunu elan etmiş "Amerikanın Ocean Infinity" şirkətinin əvvəlki kommersiya öhdəlikləri ilə bağlıdır.
Fevralın sonunda xəbər verilmişdi ki, itkin düşən təyyarənin axtarışı 11 ildən sonra bərpa edilib.
Malayziyanın nəqliyyat nazirliyi Hind okeanında itən təyyarəni axtaran gəmilərə hərtərəfli dəstək verməyə hazır olduğunu bildirib.
Malayziya Hava Yollarına məxsus Boeing 777-200 təyyarəsi 2014-cü il martın 8-nə keçən gecə Kuala-Lumpurdan Pekinə uçmuş və təxminən iki saat sonra radar ekranlarından itmişdir.
Təyyarədə 227 sərnişin və 12 ekipaj üzvü olub. 2015-ci ilin yanvarında Malayziya səlahiyyətliləri təyyarənin qəzaya uğradığını və göyərtəsində olan hər kəsin öldüyünü bildirib.
Təyyarənin izi hələ tapılmayıb.