Kürdəmirdə ölümlə nəticələnən yol qəzası baş verib.
APA-nın xəbərinə görə, hadisə bu gün səhər saatlarında Bakı-Qazax əsas magistral yolunun rayonun Atakişili kəndindən keçən hissəsində qeydə alınıb.
Bakı şəhər sakini Ruslan Əli oğlu Xasıyanov idarə etdiyi "Toyota Prius" markalı maşınla hərəkətdə olarkən yol kənarında dayanmış Bərdə rayon sakini Salman Lətif oğlu Allahverdiyevə məxsus "Mercedes" markalı yük maşınına çırpılıb. Nəticədə minik maşınının sərnişini, 2000-ci il təvəllüdlü Elnur Cavanşir oğlu Mənsimov hadisə yerində ölüb.
"Toyota"nın sürücüsü R.Xasıyanov, sərnişinləri Bakı şəhər sakinləri - Vahid Hüseynağa oğlu Qasımov, İslam Rövşən oğlu Səmədov və yük maşınının sürücüsü S. Allahverdiyev müxtəlif dərəcəli bədən xəsarətləri ilə Kürdəmir rayon Mərkəzi Xəstəxanasına yerləşdiriliblər.
Zərərçəkən İ.Səmədovun vəziyyəti daha ağır olduğundan o, Bakı şəhərindəki xəstəxanalardan birinə göndərilib.
Faktla bağlı araşdırma aparılır .