Beynəlxalq Peşəkar Futbolçular Assosiasiyaları Federasiyasının (FIFPro) versiyasına görə, İspaniyanın "Real Madrid" klubunun hazırkı beş futbolçusu və İngiltərənin "Mançester Siti" klubunun dörd futbolçusu ilin komandasına daxil edilib.
Ucnoqta.az xəbər verir ki, bu barədə FIFPro-nun mətbuat xidməti məlumat yayıb.
Səsvermədə 21 266 futbolçu iştirak edib. Sorğu 21 avqust 2023-cü ildən 2024-cü il avqustun 10-dək aparılıb.
Komandanın heyətində: qapıçı Ederson ("Mançester Siti"); müdafiəçilər - Daniel Karvaxal, Antonio Rudiger (hər ikisi "Real Madrid"), Vircil van Deyk (Liverpul, İngiltərə); yarımmüdafiəçilər - Kevin De Bruyne, Rodri (hər ikisi "Mançester Siti"), Toni Kroos ("Real Madrid", 2023/24 mövsümünün sonunda təqaüdə çıxdı), Cude Bellinqem ("Real Madrid"); hücumçular - Kilian Mbappe ("Paris Sen-Jermen", Fransa, 2024-cü ilin yayında "Real Madrid"ə keçdi), Vinisius Junior ("Real Madrid"), Erlinq Haaland ("Mançester Siti").