Bakıda və Gəncədə beynəlxalq müzakirələr keçiriləcək
Beynəlxalq Münasibətlərin Araşdırılması Mərkəzi (BMAM) Azərbaycan Respublikası Prezidenti yanında QHT-lərə Dövlət Dəstəyi Şurasının maliyyə dəstəyi ilə yeni layihə həyata keçirir. Beynəlxalq Münasibətlərin Araşdırılması Mərkəzinin Mətbuat xidmətindən Ucnoqta.az-a verilən məlumata görə, Ermənistanın regional təhdidi mövzusunda keçiriləcək müzakirələrin əsas məqsədi Ermənistanın Azərbaycan topraqlarını işğal etməsi nəticəsində regionda ölkələrarası münasibətlərin inkişafına, qarşılıqlı əlaqələrə təsir etməsi, humanitar əlaqələrin qurulmasına mane olmasının beynəlxalq ictimaiyyətə çatdırılmasıdır.
“Ermənistanın regional təhdidi mövzusunda beynəlxalq tədbirlərin təşkili” layihəsi çərçivəsində Bakı və Gəncə şəhərində iki mühüm beynəlxalq Forum keçiriləcək. Bakı şəhərində baş tutacaq tədbir may ayının 30-da, Gəncə şəhərində isə iyun ayının 12-də keçiriləcək. Bakıda və Gəncədə keçirilən Beynəlxaq Forumda yerli ekspertlərlə yanaşı, Azərbaycanda akkreditasiya olunan beynəlxalq təşkilatların, səfirliklərin təmsilçiləri yerli və o cümlədən xarici media nümayəndələrinin iştirakı nəzərdə tutulub.
Layihənin həyata keçirildiyi müddətdə “Facebook” sosial şəbəkəsində təşkilatın qrup və səhifələrində online formada İctimai Forumlar təşkil olunacaq. Bu Forumlara isə yerli iştirakçılarla bərabər əcnəbi sosial şəbəkə istifadəçiləri də cəlb olunacaq. Virtual Forumların keçirilməsində əsas məqsəd müxtəlif xarici ölkələrdən olan sosial şəbəkə istifadəçilərinin bu müzakirələrdə iştirakı və onların Ermənistanın işğalçılıq siyasəti haqqında həm məlumatlandırılması, həm də geniş təbliğat mexanizminin qurulmasıdır.
Bu Forumlar vasitəsilə Ermənistanın işğalçılıq siyasəti və bu təcavüzün regionda müxtəlif problemlər yaratması dünya ictimaiyyətinə və mediasına, vətəndaş cəmiyyətinə çatdırılacaq. Bununla bağlı Azərbaycan Respublikası Prezidenti yanında QHT-lərə Dövlət Dəstəyi Şurasının üzvü, BMAM sədri,siyasi elmlər üzrə fəlsəfə doktoru Rufiz Qonaqov bildirib ki, Ermənistanın işğalçılıq siyasəti uzun illərdir davam edir:
“Bu müddət ərzində Ermənistanda 5-ci hakimiyyət dəyişikliyi olub. Lakin heç bir halda işğalçılıq siyasətindən imtina edilməyib. Təəssüf ki, indiyə qədər dünya dövlətləri, beynəlxaql təşkilatlar təcavüzkar olan Ermənistana işğalçılıq siyasətindən əl çəkməsi üçün açıq çağırış etməmiş, Azərbaycan torpaqlarını işğaldan azad etməzsə, ona qarşı sanksiyalar tətbiq ediləcəyini bəyan etməyib”.
Rufiz Qonaqov layihənin məqsədləri haqqında danışarkən əsas məqsədin region dövlətlərinin Azərbaycana dəstəyinin ifadə olunması və torpaqlarımızın işğaldan azad edilməsi, Qarabağ münaqişəsinin həllində ölkəmizə dəstək verilməsinin təmin etmək olduğunu bildirib: “Regionda qarşılıqlı etimad, humanitar əlaqələrin güclənməsi və gələcəkdə bu təhlükənin region üçün ciddi probelmlərin yaranmasına dünya ölkələrinin, beynəlxalq təşkilatların daha çox diqqətini cəlb etmək məqsədlərimizdəndir”