Gənclər və idman naziri Azad Rəhimov bu gün İstanbulda öz işinə başlayan İslam Əməkdaşlıq Təşkilatı ölkələrinin gənclər və idman nazirlərinin 3-cü sessiyasında iştirak edir. Gənclər və İdman Nazirliyindən Trend-ə verilən məlumata görə, sessiyada gənclər və idman sahələrindəki problemlərin həll yollarının tapılması, ölkələrimizin idman nailiyyətlərinin, idman fəaliyyətinin artırılması, ictimaiyyətin idmana marağının yönləndirilməsi və gənclərin idman sahəsində potensiallarının gücləndirilməsi üçün müzakirələrin aparılması nəzərdə tutulur.
A.Rəhimov iclasda gənclər və idman sahələri istiqamətində Azərbaycanda həyata keçirilən siyasət haqqında geniş məlumat verib. Nazir qeyd edib ki, oktyabrın 18-də müstəqilliyinin 25 illiyini qeyd edəcək gənc Azərbaycanın əhalisinin 2/3 hissəsini 30 yaşından aşağı gənclər təşkil edir: "Gənclər sahəsində bu günə qədər 2005-2015-ci illəri (2005-2009 və 2011-2015-ci illər) əhatə etmiş “Azərbaycan Gəncliyi Dövlət Proqramı” həyata keçirilib, 20-dən artıq proqramı özündə cəmləşdirən və ilk dəfə olaraq 10 ili əhatə edən “2015-2025-ci illər üzrə Azərbaycan Gənclərinin inkişaf strategiyası” imzalanıb“.
A.Rəhimov ölkədə 320 QHT-nin müxtəlif istiqamətlərdə fəaliyyət göstərdiiyni, 39 Gənclər evinin mövcud olduğunu və ümümilikdə gənclər sahəsini əhatə edən bir sıra layihələr haqqında məlumat verib. Nazir həmçinin XXXI Rio Yay Olimpiya oyunlarında Azərbaycan idmançılarının qazandığı uğurlara toxunaraq, idmançılarımızın vətənə 18 medalla qayıtmasını, bununla da, medal sayına görə ölkəmizin Avropada 7-ci, İslam ölkələri arasında 1-ci, MDB-də 2-ci yerdə olduğunu diqqətə çatdırıb: “Azərbaycan daim beynəlxalq səviyyəli idman yarışlarına yüksək səviyyədə ev sahibliyi edərək, dünyada idman ölkəsi olaraq böyük nüfuz qazanıb. Məhz 2015 İlk Avropa oyunları, Formula 1 Grand Prix turniri və 2017-ci ildə reallaşacaq IV İslam Həmrəyliyi oyunları qeyd olunanların bariz nümunəsidir.”
Çıxışı əsnasında nazir IV İslam Həmrəyliyi oyunlarına geniş şəkildə toxunaraq, ətraflı məlumatı iştirakçıların diqqətinə çatdırıb. Oyunlarla bağlı iştirakçılara daha ətraflı məlumatın verilməsi üçün video çarx nümayiş olunub.
İslam Sammiti Konfransının 13-cü sessiyası sonrası baş tutacaq gənclər və idman nazirlərinin Konfransında “İƏT 2025 Fəaliyyət Planı”ndakı gənclər və idman sahəsi ilə bağlı prinsip və məqsədlərə nail olmaq üçün effektiv strategiyaların həyata keçirilməsi ilə bağlı müzakirələrin aparılması da planlaşdırılır.
İclasda Dialoq və Əməkdaşlıq uğrunda İslam Konfransı Gənclər Forumunun (DƏ İKGF) Gənclər Fəaliyyəti , o cümlədən İslam Həmrəyliyi İdman Federasiyasının (İHİF) İdman Fəaliyyəti haqqında hesabatı, İslam Əməkdaşlıq Təşkilatının gənclər strategiyası və birgə gənclər siyasəti, həmçinin idman strategiyası ilə bağlı təqdimatların keçirilməsi nəzərdə tutulub. Konfransda İƏT Gənclər Strategiyası, İƏT Idman Strategiyası, Gənclər üzrə qətnamələr, İdman məsələləri üzrə qətnamələr , Konfransın yekun hesabatı, İstanbul Bəyannaməsi, növbəti konfransın yeri və vaxtı ilə bağlı yekun sənədlər qəbul olunacaq.
Qeyd edək ki, gənclər və idman nazirlərinin 3-cü sessiyası İslam Əməkdaşlıq Təşkilatının (İƏT) xarici işlər nazirləri Şurasının 42-ci sessiyasına (Küveyt , 27-28 may, 2015-ci il) və gənclər və idman nazirlərinin İslam Konfransının 2-ci sessiyasının (Ciddə, 17-18 mart, 2014-cü il) qərarlarına əsasən keçirilir.