3-cü Şuşa Qlobal Media Forumu çərçivəsində Türk Dövlətləri Təşkilatının Media Şöbəsi forumda iştirak edən mətbuat və media qurumlarının nümayəndələri ilə görüş keçirib.
Ucnoqta.az MEDİA-ya istinadən xəbər verir ki, görüş zamanı Təşkilatın missiyası, strukturu və əsas fəaliyyət istiqamətləri barədə ətraflı təqdimat nümayiş olunub. Təqdimatdan sonra təşkil edilən interaktiv sual-cavab sessiyası qarşılıqlı fikir mübadiləsi və media sahəsində əməkdaşlıq imkanlarının müzakirəsi baxımından mühüm platforma rolunu oynayıb.
Tədbirdə media dayanıqlılığının möhkəmləndirilməsi, dezinformasiya ilə birgə mübarizə mexanizmləri, süni intellektin informasiya axınına təsiri və jurnalist peşəkarlığının təşviqi istiqamətində təcrübə mübadiləsi aparılıb. Eyni zamanda kommunikasiya sahəsinə məsul olan struktur bölmələrin fəaliyyətinin gücləndirilməsi, türkdilli dövlətlərin media subyektləri arasında qarşılıqlı əməkdaşlığın genişləndirilməsi, həmçinin prioritet hədəflərin və birgə təşəbbüslərin müəyyənləşdirilməsi ilə bağlı məsələlərə toxunulub, media savadlılığının yüksəldilməsi üçün ortaq layihələrin həyata keçirilməsinin zəruriliyi vurğulanıb.
Qeyd edilib ki, sözügedən görüş Türk dövlətlərinin media məkanında ortaq dəyərlərin qorunması, rəqəmsal platformalarda milli kontentin gücləndirilməsi və etibarlı informasiya mühitinin formalaşdırılması baxımından xüsusi əhəmiyyət daşıyır.