Rosrıbolovstvo Xəzər dənizində nərə balığı növlərinin kommersiya məqsədli ovlanmasına qoyulan qadağanın uzadılmasını təklif edir.
Ucnoqta.az xəbər verir ki, bu barədə Balıqçılıq üzrə Federal Agentliyin rəhbəri İlya Şestakov Nevski Beynəlxalq Ekoloji Konqresində məlumat verib.
"Bizim əsas vəzifəmiz nərə balıqlarının ovlanmasına kommersiya qadağasını davam etdirməkdir. Hazırda onun müddəti hər il uzadılır. Nərə balıqlarının kommersiya ovuna qadağa qoyulması ilə bağlı qərarların qəbulunu davam etdirmək lazımdır", – Şestakov bildirib.
O, həmçinin qeyd edib ki, Xəzər dənizində nərə balığının bəzi növləri artıq tələf olub. Yalnız təcrid olunmuş obyektlərə rast gəlinir. Çox güman ki, dövlətlərin su bioresurslarının çoxalması üçün göstərdiyi səylər çərçivəsində belə onlar artıq bərpa olunmur", – o əlavə edib.
Xatırladaq ki, 2024-cü ilin dekabrında Rusiya, Azərbaycan, Qazaxıstan, Türkmənistan və İran Xəzər dənizində nərə balıqlarının kommersiya məqsədli ovlanmasına qoyulan qadağanı 2025-ci ilə qədər uzadıb.