Böyük Amerika Liqası klubu "İnter Mayami"nin və Argentina millisinin hücumçusu Lionel Messi Beynəlxalq Futbol Federasiyasının (FIFA) versiyasına görə 2024-cü ilin ən yaxşı futbolçusu adına iddialılar siyahısına daxil edilib.
Ucnoqta.az xəbər verir ki, bu barədə qurumun mətbuat xidməti məlumat yayıb.
Kişilər arasında mükafata namizədlər siyahısına İspaniyanın “Real Madrid” klubunun futbolçuları, ispan Daniel Karvahal, uruqvaylı Federiko Valverde, ingilis Jude Bellinqhem, fransız Kilian Mbappe ("Real Madrid") və braziliyalı Vinisius, habelə norveçli Erlinq Holland , ispan Rodri ("Mançester Siti"), alman Florian Virtz ("Bayer") və ispan Lamin Yamal ("Barselona") daxil olub.
Siyahıda “Real Madrid”in sabiq futbolçusu, Avropa çempionatından sonra karyerasını başa vuran alman Toni Kroos da var.
Messi keçən il bu kateqoriyada qalib olub, onun adına üç mükafat var.
Portuqaliyalı Kriştiano Ronaldo və polşalı Robert Levandovski iki dəfə ilin ən yaxşı oyunçusu seçilib. Nominasiyada bir dəfə xorvat Luka Modriç qalib olub.