“Bolt” şirkəti taksi tariflərini artırmayıb.
Bu barədə “Bolt” şirkətindən “APA-Economics”in sorğusuna cavab olaraq bildirilib.
““Bolt” ilə səyahətlərin qiyməti dəyişməyib. Lakin səyahətin yekun dəyəri müxtəlif göstəricilərdən asılı olaraq avtomatik olaraq artıb-azala bilər. Bura yoldakı vəziyyət, hava şəraiti, səfərlərə tələbat və digər amillər daxildir" – şirkətin açıqlamasında bildirilib.
“Bolt” şirkətinin sürücüsü Elnur Əliyev də açıqlamasında deyib ki, hələlik heç bir qiymət artımı olmayıb: ““Bolt” taksi şirkəti qiymətləri qaldırmayıb. Lakin qiymətlərin qaldırılması daha yaxşı olardı. Çünki qiymətlərin bu qədər aşağı olması bizim üçün sərfəli deyil”.
O bildirib ki, günlük 25 sifariş götürərək ümumi əldə etdiyi 80 manatdan 30-40 manat qazancı olur. E.Əliyev deyir ki, “Bolt” taksi sürücüləri minimal qiymətin 4 manatdan hesablanmasını istəyir. Digər “Bolt” sürücüsü Ruslan Məmmədov da qiymətlərin qalxmadığını deyib.
Qeyd edək ki, müxtəlif istiqamətlər üzrə taksi sifarişi zamanı da hələlik ki, qiymətlərdə hər hansı artım gözə dəyməyib.