Geomaqnit sahə 3 sutka ərzində sakit-aktiv səviyyələr arasında olub və hazırda sakitdir
Bu barədə Ucnoqta.az-a Nəsrəddin Tusi adına Şamaxı Astrofizika Rəsədxanasından məlumat verilib. Bildirilib ki, hesabat dövrü ərzində Günəş fəallığı artıb:
“Fevralın 11-i saat 19:50-də 3217 oblastında X 1.16 sinifli alışma baş verib. Sutkalıq maksimum fevralın 12-si saat 12:48 də 3217 oblastında baş verib M3.18 sinifli alışma olub. Günəşin səthində 12 aktiv ləkə qrupu müşahidə olunur, aktiv ləkələrin sayı 197-dir. Alışmalara bağlı olaraq radiosiqnalların ötürülməsində R2-R3 sinifli kəsilmələr baş verib. Hesabat dövrü ərzində Yerə doğru yönəlmiş CME (Coronal Mass Ejections – Tac Maddə Atılmaları) qeydə alınmayıb”.
Bildirilib ki, 13-15 fevral tarixlərində Günəş fəallığının aktiv olacağı gözlənilir. M sinif alışmanın baş verməsi ehtimalı 75%, X sinif isə 23% təşkil edir:
“2 MeV-dən çox enerjili elektron selinin proqnoz dövründə orta və ya gözlənilən alışmlar səbəbi ilə pik səviyyə arasında dəyişəcəyi gözlənilir. Enerjisi 10 MeV-dən çox olan proton selinin fon səviyyəsində qalacağı gözlənilir. S1 və daha yüksək səviyyəli radiasiya qasırğasının baş vermə ehtimalı 18% təşkil edir”.
Qeyd olunub ki, proqnoz dövründə geomaqnit sahədə ümumi sakitlik proqnozlaşdırılır:
“Birbaşa Yerə yönəlməsə belə çox yaxınlıqdan keçən CME-lər səbəbilə maqnit sahəsinin bir qədər aktivləşəcəyi gözlənilir (4Kp). G1 və daha yüksək səviyyəli geomaqnit qasırğasının yaranması gözlənilmir”.