Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin nümayəndəsi 2016-cı il 7-8 dekabr tarixində Efiopiyanın paytaxtı Əddis-Əbəbə şəhərində səfərdə olub. Xarici İşlər Nazirliyindən Ucnoqta.az-a verilən məlumata görə, Afrika İttifaqının (Aİ) dəvəti əsasında baş tutmuş səfərin məqsədi Azərbaycanın qabaqcıl “ASAN xidmət” modelini qitə ölkələrinə daha geniş formatda təqdim etmək və dövlət xidmətlərinin göstərilməsi sahəsində Azərbaycanın Aİ ilə əməkdaşlığını genişləndirməkdir.
Səfər çərçivəsində Azərbaycanın Efiopiyadakı səfiri və Afrika İttifaqı yanındakı daimi nümayəndəsi Elman Abdullayevin rəhbərlik etdiyi və tərkibinə Dövlət Agentliyinin nümayəndəsinin də daxil olduğu heyət Aİ-nin mənzil qərargahında “Dövlət xidmətləri və idarəetmə” mövzusunda təşkil edilmiş xüsusi sessiyada iştirak edib.
Sessiyada Dövlət Agentliyinin nümayəndəsi dövlət idarəçiliyi və dövlət xidmətlərinin göstərilməsi sahəsində Azərbaycan Respublikasının Prezidenti cənab İlham Əliyevin həyata keçirdiyi səmərəli islahatların tərkib hissəsi kimi yaradılmış “ASAN xidmət”in fəaliyyəti və nailiyyətləri barədə geniş təqdimatla çıxış edib. Bildirilib ki, fəaliyyətində şəffaflıq, operativlik, əlçatanlıq, məsuliyyətlilik və rahatlıq prinsiplərini rəhbər tutan və vətəndaş məmnunluğuna söykənən “ASAN xidmət” dövlət xidmətlərinin göstərilməsi sahəsində yeni düşüncə və konsepsiyanın əsasını qoymuşdur. Azərbaycanın bu brendi BMT-nin Dövlət Xidmətləri Mükafatının qalibi olaraq dünyada bu sahədə ən qabaqcıl mexanizm kimi tanınır.
Qeyd edilməlidir ki, Azərbaycan Afrika İttifaqının üzvü olmayan yeganə ölkə qismində dövlət xidmətlərinin göstərilməsi sahəsində öz təcrübəsini bölüşmək məqsədi ilə müstəsna olaraq sessiyada iştiraka dəvət edilib.
Təqdimatla yanaşı Afrika İttifaqının mənzil qərargahında “ASAN xidmət”in fəaliyyəti və nailiyyətlərini əks etdirən stend qurulub. Tədbir iştirakçılarının böyük maraq göstərdiyi stendə təşkilatın rəsmiləri, o cümlədən Afrika İttifaqı Komissiyasının sədr müavini cənab Erastus Mvença və Komissiyanın baş katibi xanım Djeneba Diarra baxış keçirib, “ASAN xidmət”in fəaliyyəti ilə tanış olublar.
Səfər çərçivəsində, həmçinin Efiopiya Federal Demokratik Respublikasının dövlət qulluğu və insan resurslarının inkişafı üzrə dövlət naziri cənab Adamo Ayane və Xarici İşlər Nazirliyinin Siyasi araşdırmalar və təhlil idarəsinin rəhbəri cənab Mekonen Haddis ilə də görüşlər keçirilib. Görüşlərdə dövlət xidmətlərinin göstərilməsi sahəsində Azərbaycanda həyata keçirilən islahatlar barədə məlumat verilib və bu istiqamətdə Azərbaycan Efiopiya arasında gələcək əməkdaşlıq perspektivlərinə dair fikir mübadiləsi aparılıb.
Elmin
