"Real Madrid"də əfsanəvi futbolçuya çevrilən Luka Modriçin gələcəyi hələ bəlli deyil.
Ucnoqta.az xəbər verir ki, tanınmış komandalardan təkliflər alan 37 yaşlı futbolçunun 200 milyon avroluq transfer təklifini qəbul etmədiyi məlum olub.
"Real Madrid"də çıxış edən xorvatiyalı ulduz Luka Modriç 2018-ci ildə "Qızıl top"u qazanıb. Digər tərəfdən, ulduz futbolçunun "Real Madrid"lə müqaviləsi 30 iyun 2023-cü ildə başa çatır.
Argentinada 18-ci dəfə Dünya Kuboku matçına çıxan Xorvatiya Millisinin kapitanı Luka Modriç bu təcrübəni 4 fərqli turnirdə yaşayıb. (2006, 2014, 2018, 2022) 37 yaşlı ulduz bu prosesdə ölkəsi ilə bir dəfə finalda, bir dəfə isə yarımfinalda uğurla çıxış edib.
2012-ci ildən İspaniyanın "Real Madrid" komandasında çıxış edən Luka Modriç La Liqa nəhəngi ilə ümumilikdə 488 rəsmi oyuna çıxıb. Təcrübəli futbolçu sözügedən qarşılaşmalarda 37 dəfə rəqib torunu silkələməyi bacarsa da, komanda yoldaşlarına 77 qol ötürməsi verib.
Futbola ölkəsinin "Zadar" komandasında başlayan Modriç 2008-ci ildə "Dinamo Zaqreb"dən "Tottenhem"ə keçərək Avropada debüt edib.
İngiltərə nəhəngində göstərdiyi performansla dünya nəhənglərinin diqqətini çəkən ulduz futbolçu 2012-ci ildə 35 milyon avroya Real Madridə transfer olunub.
"Real Madrid" forması altında beşi Çempionlar Liqası kuboku olmaqla 23 kubok qazanan Luka Modriç 37 yaşı olmasına baxmayaraq, öz mövqeyində ən yaxşı adlardan biri kimi göstərilir.
Əldə edilən məlumata görə, Səudiyyə Ərəbistanının “Əl-Hilal” komandası “Real Madrid”də gələcəyi hələ bəlli olmayan Luka Modriçə illik 200 milyon avro qarşılığında şifahi olaraq 3 illik müqavilə təklif edib.
Di Marzionun hesabatına görə, Luka Modriç "Əl-Hilal"ın illik 200 milyon avroluq təklifini rədd edib.