Tarixində ilk dəfə avrokuboklarda çıxış edəcək “Sabah”ın ev oyunlarını hansı stadionda keçirəcəyi bəlli olub.
Oxu.Az saytının əldə etdiyi məlumata görə, UEFA Konfrans Liqasında yarışacaq komandaya rəqiblərini “Bank Respublika Arena”da qəbul etmək icazəsi verib.
“Sabah” II təsnifat mərhələsində ev oyununu məhz orada keçirəcək. Komanda mərhələ adlayacağı təqdirdə, yenidən həmin məkanda oynaya bilər. Pley-offla bağlı qərar isə hələlik verilməyib.
Qeyd edək ki, adıçəkilən stadion standartlara cavab vermədiyi üçün “Sabah” rəqiblərini fərqli məkanda qəbul edəcəyi ehtimal edilirdi. Ancaq arenada aparılan təmir işləri vəziyyətin dəyişməsinə səbəb olub.
Xatırladaq ki, Azərbaycan Premyer Liqasında gümüş medalları əldə edən “Sabah” ilk dəfə Avropada oynamaq hüququ əldə edib.