Masallıda toy karvanında avtoxuliqanlıq edən şəxs saxlanılıb.
APA-nın cənub bürosunun məlumatına görə, sosial şəbəkələrdə toy karvanında avtoxuliqanlıq edən şəxsin videogörüntüləri yayılıb. Həmin görüntülərin Masallı rayonu "Ərkivan dairəsi" adlanan yerdə çəkildiyi məlum olub. Sürücü gündüz saatlarında nəqliyyatın və piyadaların sıx hərəkətdə olduğu ərazidə nümayişkaranə şəkildə avtoxuliqanlıq hərəkətləri edib. Paylaşılan həmin avtoxuliqanlıq görüntüləri ilə bağlı dərhal Masallı Rayon Polis Şöbəsində müvafiq araşdırma aparılıb. Həmin avtoxuliqanlıq əməlini törədən sürücü Yusifəli İsmayılov və avtomobilin sahibi Mirfəttah Fəttahlı müəyyən edilərək barələrində toplanmış material hüquqi qiymət verilməsi üçün Masallı Rayon Məhkəməsinə göndərilib. Məhkəmənin qərarı ilə Yusifəli İsmayılov sürücülük hüququ 1 il müddətinə məhdudlaşdırılmaqla 15 gün müddətində inzibati qaydada həbs olunub.
Mirfəttah Fəttahlı isə cərimə olunub. Bundan başqa, həmin vaxt orada olan və müxtəlif qayda pozuntularına yol verən digər 4 sürücü barəsində də İnzibati Xətalar Məcəlləsinin müvafiq maddələrinə əsasən inzibati qaydada protokol tərtib edilib.
