Mingəçevir Media Mərkəzində Mingəçevir Valideynlər Assosiasiyasının Çexiya (“Transitions”) və Polşadan (“Linking Media”) olan tərəfdaşları ilə birgə keçirdiyi açıq məlumatlara dair təlimlər davam edir. Təlimin əsas məqsədi auditoriyanı açıq məlumatlarla tanış etmək və gələcəkdə onlara məlumatları hamının başa düşəcəyi şəkildə təqdim etməyi öyrətməkdir. Avropa Birliyinin maliyyələşdirdiyi və BMT-nin İnkişaf Proqramı tərəfindən həyata keçirilən “Əhalinin həssas qruplarının sosial-iqtisadi hüquqlarının təmin olunmasında vətəndaş cəmiyyətinin rolunun gücləndirilməsi” layihəsi çərçivəsində reallaşdırılan təlimdə QHT, dövlət və KİV nümayəndələri iştirak edib.
Mingəçevir Valideynlər Assosiasiyasının prezidenti Fərman Nəbiyevin sözlərinə görə, bu təlimlərə Bakıdan və Azərbaycanın digər bölgələrindən QHT, dövlət və KİV təmsilçiləri qatılıb: “3 gün ərzində onlar açıq məlumatlar konsepsiyasını müzakirə edib, Belorus, Avropa Birliyi və dünya KİV-lərinin, QHT və dövlət orqanlarının açıq məlumatlarla işləmə təcrübəsini öyrənib. İştirakçılar açıq məlumat portalları, məlumat mənbələri, vizuallaşdırma alətləri ilə tanış olub, xəritələr üzərində işləməyi öyrəniblər”.
F.Nəbiyevin sözlərinə görə, cümə axşamı Mingəçevir Dövlət Universitetinin tələbə-gəncləri üçün mitap təlimi təşkli olunub, cümə günündən isə növbəti qrup üçün üç günlük təlimə başlanıb: “Məqsəd auditoriyanı açıq məlumatlarla tanış etmək və gələcəkdə onlara məlumatları hamının başa düşəcəyi şəkildə təqdim etməyi öyrətməkdir”.
Mingəçevir İcra Hakmiyyətinin məsul işçisi Sahib Əliyev ölkə üçün vacib olan belə tədbirin Migəçevirdə keçirilməsindən məmnunluğunu ifadə edib. Şəhər statistika İdarəsinin rəisi Etibar Kərimov maraqlı ideyalarla çıxış edib.
Tədbirləri izləyən və təlimlərin gedişindən məmnun qalan BMTİP əməkdaşları əmin olduqlarını bildiriblər ki, proqramın uğurla icrası Azərbaycanın hökümət, QHT və KİV nümayəndələrinə əhali ilə daha rahat işləmək imkanı yaradacaq.
Noyabrın 27-dək davam edəcək təlimləri “Linking Media” təşkilatının nümayəndəsi, media üzrə mütəxəssis Lyaksey Lyavonçik idarə edir.