Bakı şəhərinin Avtovağzal ərazisində yerləşən Motodrom yaşayış massivində günlərdir içməli suyun küçəyə axması sakinlərin narazılığına səbəb olub.
Ucnoqta.az xəbər verir ki, bununla bağlı görüntülər sosial şəbəkələrdə yayılıb.
Sakinlərin saytımıza verdiyi məlumata görə, yaşayış massivində zədələnmiş içməli su borusundan günlərdir tonlarla təmiz su küçəyə axır. Onların sözlərinə görə, məsələ ilə bağlı aidiyyəti qurumlara məlumat verilsə də, problem hələ də aradan qaldırılmayıb.
Sakinlər bildirirlər ki, öz vəsaitləri hesabına küçəni təmir etdikdən sonra Azərbaycan Dövlət Su Ehtiyatları Agentliyinin briqadaları yolu qazıb. Lakin sonradan ərazi əvvəlki vəziyyətinə qaytarılmayıb və yol bərbad hala düşüb.
Qeyd olunur ki, bu ərazidə su borularında analoji qəzalar əvvəllər də dəfələrlə baş verib. Nəticədə hər dəfə tonlarla içməli su israf olunur.
Məsələ ilə bağlı Azərbaycan Dövlət Su Ehtiyatları Agentliyinin mövqeyini təqdim etməyə hazırıq.