Kifayət qədər yuxu almaq depressiya riskini azaltmağa kömək edə bilər.
Ucnoqta.az xəbər verir ki, London Universitet Kollecinin (UCL) alimlərinin araşdırmasına görə, gecə müntəzəm olaraq 5 saatdan az yatmaq depressiya ehtimalını əhəmiyyətli dərəcədə artırır.
7146 nəfərin məlumatları əsasında aparılan tədqiqat göstərib ki, həm genetik olaraq az yatmağa meylli olanlar, həm də vərdiş olaraq 5 saatdan az yatanlar sonrakı illərdə depressiya və tənhalıq hissi ilə daha çox qarşılaşırlar. Digər tərəfdən, 9 saatdan çox yuxu da depressiya riski ilə əlaqələndirilib.
Alimlər hesab edirlər ki, böyüklər üçün gecədə 7–9 saat yuxu həm fiziki, həm də psixi sağlamlıq baxımından ən uyğun müddətdir.
Mütəxəssislər vurğulayırlar ki, yuxu pozuntuları və depressiya bir-birinə təsir göstərə bilər. Buna görə də uzunmüddətli yuxu problemləri və ya davamlı ruh düşkünlüyü yaşayan şəxslərin həkimə müraciət etməsi tövsiyə olunur.