Alman avtomobil istehsalçısı Mercedes-Benz Berlindəki bütün salonlarını Alpha Auto Group-un rəhbəri kanadalı sahibkar Kuldip Billana satıb.
Ucnoqta.az bildirir ki, Bild qəzeti bu barədə biznes mənbələrinə istinadən məlumat verib.
Satış Almaniya paytaxtındakı təxminən 1500 nəfərin işlədiyi yeddi filiala aiddir. Qəzetin məlumatına görə, Mercedes-Benz həmçinin digər şəhərlərdə – Hamburq, Münhen və Reyn-Rur bölgəsində salonlarını satmağı planlaşdırır ki, bu da ümumilikdə 8000 iş yerini təhlükə altına qoya bilər.
Berlin mağazalarının işçilərinə sövdələşmə barədə elektron poçt vasitəsilə məlumat verilib. Onlara pul kompensasiyası və ya cəmi bir il müddətinə iş zəmanəti arasında seçim təklif edilib. Bundan sonra onların mövcud müqavilələri ləğv edilməli və yeniləri imzalanmalıdır. Lakin yeni sahibin kollektiv müqaviləyə nə dərəcədə riayət edəcəyi məlum deyil.
Bild qeyd edib ki, Berlin Mercedes-Benz dilerlərinin işçiləri iki il ərzində satışın qarşısını almağa çalışıblar, lakin bütün səyləri uğursuz olub.