Aprelin 22-də İmişli rayon prokurorluğunda “Açıq qapı” günü təşkil olunub.
Baş Prokurorluğun Mətbuat xidmətindən Ucnoqta.az-a verilən xəbərə görə, tədbirdə media nümayəndələri, qeyri-hökumət təşkilatlarının təmsilçiləri, eləcə də ictimai fəallar iştirak ediblər.
“Açıq Qapı” gününün əsas məqsədi vətəndaşların prokurorluq orqanlarının fəaliyyəti ilə yaxından tanış olmalarını təmin etmək, hüquqi maarifləndirmə işini genişləndirmək və prokurorluq orqanlarının şəffaflıq prinsiplərinə əsaslanan fəaliyyətini ictimaiyyətə təqdim etmək olub.
Tədbiri giriş sözü ilə açan İmişli rayon prokuroru Valeh Səmədov çıxış edərək bu cür görüşlərin hüquqi biliklərin artırılması baxımından mühüm əhəmiyyət daşıdığını qeyd edib. O, prokurorluq orqanlarının fəaliyyətində vətəndaş hüquq və azadlıqlarının qorunmasının, şəffaflığın təmin olunmasının və ictimaiyyətlə açıq dialoqun əsas prioritet istiqamətlərdən olduğunu vurğulayıb.
Tədbir çərçivəsində Baş Prokurorluğun Mətbuat xidmətinin böyük prokuroru Kənan Zeynalov çıxış edərək respublika üzrə prokurorluq orqanlarının strukturu, funksiyaları və son illərdə həyata keçirilən islahatlar barədə məlumat verib.
Tədbirdə iştirak edən İmişli rayon prokurorluğunun əməkdaşları da öz fəaliyyət sahələri üzrə məlumat verərək praktiki təcrübələrini iştirakçılarla bölüşüblər.
Tədbir zamanı iştirakçılar “Elektron prokurorluq” informasiya sistemi, eləcə də prokurorluq orqanlarının istifadəsində olan müasir kriminalistik avadanlıqlarla yaxından tanış olub, onların istintaq və araşdırma proseslərində tətbiqi barədə ətraflı məlumat əldə ediblər.
Daha sonra prokurorluğun inzibati binası ilə tanışlıq turu təşkil olunub.