Haiti millisinin baş məşqçisi Stefan Minye Azərbaycana qalib gəldikləri (3:0) yoldaşlıq görüşündən sonra mətbuat konfransında iştirak edib.
Ucnoqta.az xəbər verir ki, o, Sumqayıtdakı görüşlə bağlı fikirlərini bildirib.
– Komandamın nümayiş etdirdiyi oyundan razı qaldım. Bilirdik ki, çətin matç olacaq. Ardıcıl olaraq 9-cu qələbəmizi əldə etdik. Tarixdə ilkdir. Üstəlik, Avropada ilk qalibiyyəti qazandıq. Azərbaycan yaxşı komandadır. Qalibiyyətə görə şadıq.
– Rəqibinizdən Avropa komandalarına xas hansısa xüsusiyyət gördünüz?
– Fərqli atmosfer idi. Bu cür stadionda, atmosferdə komandamın necə oynayacağını maraqla gözləyirdim. Futbolçularım gözləntilərimi qarşılaya bildi.
– Yoldaşlıq görüşü üçün Haitidən Azərbaycana gəlmisiniz. Başqa rəqib tapa bilmədiniz?
– FİFA pəncərəsi ilə bağlıdır. KONKAKAF turnirinə vəsiqə qazanmışıq. Bizim beş komanda ilə oynamaq şansımız oldu. İsveçrə, Azərbaycan, İrlandiya və digərləri. Azərbaycana müraciət etdik və müsbət cavab aldıq. Hər şey yaxşı idi.
– Azərbaycan millisininin ən zəif nöqtəsi hansı oldu?
– Biz Azərbaycan millisini təhlil etmişdik. Onların zəif və güclü tərəflərini bilirdik. Mən hər zaman öz komandama fokuslanıram. Rəqibə pressinq tətbiq etməyi bacardıq. Yaxşı da müdafiə olunduq. ///sportal.az