Qəhvə və çayı qırmızı ət və yaşıl yarpaqlı tərəvəzlərlə birlikdə istehlak etmək tövsiyə edilmir.
Ucnoqta.az xəbər verir ki, bu barədə Daily Mail-ə amerikalı əczaçı və dietoloq Debora Qreyson məlumat verib.
Həkim izah edib ki, bu isti içkilərin tərkibində olan polifenol adlanan kimyəvi maddələr dəmirin sorulmasına mane olur.
Bu, oksigenin bütün bədənə daşınması üçün vacib olan bir mineraldır. İmmunitet sisteminin normal fəaliyyətini təmin edən və insanların enerjili qalmasına kömək edən oksigendir.
Dəmir çatışmazlığı anemiyaya səbəb ola bilər. Bu vəziyyət adətən tez-tez yorğunluq, zəiflik, yuxululuq, saç tökülməsi və təkrarlanan soyuqdəymə ilə xarakterizə olunur.
Qırmızı ət (mal, quzu, donuz əti), brokoli, ispanaq, kələm, kolrabi, rukkola, pazı və yaşıl salat dəmirlə zəngindir.
Polifenollar, öz növbəsində, çay və qəhvə ilə müqayisədə daha az miqdarda olsa da, meyvələrdə, tərəvəzlərdə və ədviyyatlarda olur.
Diyetoloq əlavə edib ki, şərabda olan taninlər və oksalatlar adlanan bitki birləşmələrinin də dəmiri bloklayan təsirləri məlumdur.
Bu səbəbdən Qreyson steyki şərabla birləşdirmək vərdişindən əl çəkməyi tövsiyə edir.