UEFA-nın rəsmi saytı Avropa Liqasının 1/8 final mərhələsində "Bayer" lə "Qarabağ" arasında keçiriləcək cavab oyunu haqqında yazı hazırlayıb.
Ucnoqta.az qafqazinfo-ya istinadən xəbər verir ki, yazıda "Qarabağ"ın "Bayer"lə (2:2) doğma meydanda keçirilən oyununda uğurlu çıxışından bəhs edilib.
Bildirilib ki, Ağdam təmsilçisi əla futbol nümayiş etdirib: "Alonso ilə mübarizə etmək çətindir. "Bayer"ə bu mövsüm məğlubiyyət yaşadan ilk komanda olmağa çox yaxın idilər. Almaniya nəhəngi yalnız əlavə olunmuş vaxtda Patrik Şikin qolu sayəsində məğlubiyyətdən qaça bildi".
Qitə futbol qurumu yazısında həmçinin Qurban Qurbanov haqqında fikirlərə də yer verib: "Komanda son 16 ildə Qurban Qurbanovun rəhbərliyi altında sabit şəkildə inkişaf edir. Əgər "Qarabağ" əvvəllər ən yaxşı oyunlarını doğma meydanında keçirirdisə, indi rəqib meydanında da daha inamlı çıxış edir".
Xatırladaq ki, "Bayer" – "Qarabağ" görüşü martın 14-ü yerli vaxtla saat 21:00-da (Bakı vaxtı ilə gecə 00:00-da) başlanacaq.