Abdulla Şaiq adına Azərbaycan Dövlət Kukla Teatrı daha bir səhnə işini balaca teatrsevərlərin ixtiyarına verib.
Bu barədə Ucnoqta.az-a teatrın mətbuat xidmətindən bildirilib. Belə ki, kuklaçılar bu dəfə uşaqların sevimli yazıçısı, məşhur nağılçı Hans Xristian Andersenin yaradıcılığından ona xüsusi şöhrət gətirən “Düyməcik” nağılına müraciət ediblər.
Tamaşanın səhnələşdirəni və quruluşçu rejissoru teatrın baş rejissoru, Əməkdar artist Qurban Məsimov, quruluşçu rəssamı Rəvanə Yaqubova, bəstəkarı Əməkdar artist Vüqar Camalzadədir.
Musiqili nağıl-tamaşada rolları Əməkdar artist Cəmilə Allahverdiyeva, aktyorlar Rəhim Rəhimov, Samirə Nəcəfova, Nərmin Əhmədova, Yasin Abbasov və Ramiz Qəmbərov ifa edirlər.
Açıq kukla idarəetmə texnikasından istifadə edilməklə hazırlanan (tamaşada əsas oyun canlı plan üzərindən təqdim olunur) nümunədə fərqli plan və forma seçilərək animasiya ilə klassik kukla estetikasının vəhdətinə nail olunub.
Yeni və maraqlı üslubda dekorasiya və əlbisələrin olduğu tamaşada pantom və mimikalar ilə oyun texnikalarından da istifadə edilib.
Maraqlı və baxımlı olduğu qədər də ibrətamiz nümunədə əsərdən irəli gələn əsas xətt – insanı bütün arzularına çatdırıb, möcüzələrə inandıran saf hissləri və ümididir saxlanılmaqla dinamik yozuma nail olunub.
Xatırladaq ki, çiçəkdən doğulmuş barmaq boyda gözəl bir qızcığazın nağılını “danışan” bu nümunə 1835-ci ildə Danimarkada çap olunub və elə o vaxtdan müəllifini tanıtmağa başlayıb.
Andersenin əksər nağılları kimi müəllif təxəyyülünün məhsulu olan “Düyməcik” 1907-ci ildən teatr səhnələrinə və animasiya filmlərinə mövzu olmaqdadır.