“Qarabağ” Çempionlar Liqasının başa çatan qrup mərhələsində ən çox qırmızı vərəqə alan komanda olub.
Ucnoqta.az “Qafqazinfo”ya istinadən xəbər verir ki, Ağdam təmsilçisinin 3 futbolçusu – cənubi afrikalı hücumçu Dino Ndlovu, braziliyalı yarımmüdafiəçi Pedro Enrike və müdafiəçi, kapitan Rəşad Sadıqov meydandan kənarlaşdırılıb.
Təmsilçimizin bu göstəricidə ən yaxın izləyicisi Portuqaliyanın “Benfika” klubudu. Lissabon təmsilçisinin passivində 2 qırmızı vərəqə var. “Feyenoord” (Hollandiya), “Monako” (Fransa), “Porto” (Portuqaliya), “Şaxtyor” (Ukrayna), “Barcelona”, “Atletiko” (hər iksi İspaniya), “Leyptsi” (Almaniya), “Liverpul”, “Tottenhem” (hər ikisi İngiltərə), “Anderlext” (Belçika) və “Roma” nın (İtaliya) isə 1 futbolçusu “qırmızı” alıb.
Bir matçda ən çox birbaşa qırmızı vərəqə isə son turda “Porto” – “Monako” görüşündə qeydə alınıb. Meydan sahiblərinin 5:2 hesabı ilə qalib gəldiyi oyunda hər komandadan 1 futbolçu meydandan qovulub. 1:1 hesabı ilə yekunlaşan “Atletiko” – “Qarabağ” matçında Enrike birbaşa qırmızı vərəqə alıbsa, çernoqoriyalı müdafiəçi Stefan Saviç ikinci “sarı”dan sonra meydandan çıxarılıb.
Portuqaliyanın “Sportinq” klubu isə sarı vərəqə sayında liderdi - 19 . Bir oyyunda ən çox - 8 sarı vərəqə da elə bu komandanın “Barselona”ya 0:1 hesabı ilə uduzduğu qarşılaşmada göstərilib.
Qrup mərhələsinin ən intizamsız futbolçusu “Feyenoord”un yarımmüdafiəçisi Tonni Trindade de Vilena olub - 4 sarı, 1 qırmızı. Qrup mərhələsinin ən intizamlı komandası “Çelsi"di. "Qarabağ"ın rəqiblərindən biri olmuş London klubu futbolçuları cəmi 5 dəfə sarı vərəqə ilə cəzalandırılıb. “Qarabağ”ın “sarı”larının sayı isə 14-dü.
Xatırladaq ki, Ndlovu “Atletiko”, Sadıqov “Çelsi"ylə Bakı Olimpiya Stadionundakı matçda qırmızı vərəqə alıb. Enrike isə “Atletiko” ilə Madriddəki matçda meydandan qovulub. Bunlardan yalnız Ndlovu ikinci "sarı"dan sonra meydanı vaxtından əvvəl tərk etməli olub. Dino 1 oyundan sonra cəzasını bitiribsə, Rəşadla Pedro "qırmızı"yla qrupda çıxışını vaxtından öncə bitirməli olub.